Жезқазған мен Семей қаласында 500 бала робототехника және бағдарламалау негіздерін оқып үйренеді, деп хабарлайды ҚазАқпарат.
Нұрсұлтан Назарбаев Қоры қазақстандық жетекші «Роботек» робототехника мектебімен бірлесіп Ozyq Urpaq атты жаңа жобаны іске қосады. Бұл — мектеп оқушыларын робот жасауға, бағдарламалауға қызығушылығын арттыратын, дарынды балаларды анықтайтын, озық білім беріп, оқытушылар құрамының біліктілігін арттыруға бағытталған бағдарлама.
Жоба Жезқазған мен Семей қаласынан басталды. №21, 49 орта мектептерде мұғалімдер мен жергілікті білім бөлімдерінің қызметкерлері үшін бағдарламаның тұсаукесері болды.
Шара барысында ұйымдастырушылар Ozyq Urpaq бағдарламасының бағыты туралы айтты.
«Біздің мектеп 2014 жылы ашылған. Жыл сайын 700 оқушыны оқытады. Осы уақыт ішінде еліміздің жетекші мектебінің біріне айналды, робототехника бойынша түрлі турнирлердің 54 жүлдегері мен қатысушысын дайындап шығарды. Бірнеше рет робототехника бойынша республикалық жарыстың жүлдегері атандық, World Robot Olympiad, FLL Challenge үш әлемдік финалына қатыстық. Ozyq Urpaq жобасын іске асыру арқылы оқытушылардың біліктілігін арттыру, балаларға жаңа білім беру, оқушылардың IT салаға деген қызығушылығын ояту сынды бірнеше міндетке қол жеткізуге тырысамыз», — дейді Жезқазған қаласы №21 орта мектептегі тұсаукесер кезінде «Роботек» мектебінің оқытушысы Сұлтанбек Қазиев.
Оның айтуынша, «Роботек» мектебінің тәжірибелі қызметкерлері мектеп мұғалімдерін оқытады, содан кейін педагогтар 2022 жылдың қарашасынан 2023 жылдың сәуіріне дейін оқушыларға факультативтік сабақтар өткізеді. Бұл үшін педагогтар Нұрсұлтан Назарбаев қорынан жалақы алады.
«Біз бұл жобаны қолдадық, өйткені ол мұғалімдер мен балаларға әртүрлі білім алуға мүмкіндік береді. Технология тез дамып келеді, жаңа білімді уақытында игеру маңызды», — дейді Жезқазған қаласындағы №21 орта мектептің директоры Шынар Тасмұрзаева.
Ұйымдастырушылардың айтуынша, Ozyq Urpaq жобасының ауқымы кеңейіп, Қазақстанның өзге де елді мекендерін қамтиды.
