9 қараша, сәрсенбі күні Абай облысының әкімі Нұрлан Ұранхаев Қоғамдық кеңес мүшелерімен кездесті. Облыс басшысы аймақта атқарылып жатқан жұмыстар туралы айтып, алдағы жоспарларын бөлісті, қоғам қайраткерлерінің сұрақтарына жауап берді.
Кездесу барысында аймақ басшысы Абай облысының кешенді жоспарына да тоқталды.
— Мемлекет басшысы 30 қыркүйек күні Семей қаласына келген сапарында бірқатар тапсырмалар беріп, Абай облысының 2023-2025 жылдарға арналған кешенді даму жоспарын әзірлеуді тапсырды. Бұл — облыс өмірінің барлық саласына қатысты ауқымды бағдарлама. Кешенді жоспар аясында құны 300 миллиардқа жуық Аягөз — Бақты темір жолын, жаңа ЖЭО, әлеуметтік нысандар (мектептер мен ауруханалар), мұз сарайы, конгресс-холл салу көзделген, — деді Нұрлан Ұранхаев Қоғамдық кеңес өкілдеріне.
Қоғам белсенділері кездесу барысында аймақтағы өзекті мәселелерге қатысты өз көзқарастарын білдірді. Қоғамдық кеңес мүшесі Қайрат Смағұлов жер қойнауын пайдаланушыларды салықтық тіркеу мәселесін көтерді. Өйткені Абай облысының аумағында орналасқан кен орындарын игеріп жатқан көптеген компаниялар басқа өңірлерде ресми түрде тіркелген. Сондай-ақ облыста ғылыми-зерттеу институттарын құру мүмкіндігін қарастыру туралы ұсыныс айтылды.
— Әлем тез өзгеруде, бәсекеге қабілетті болу үшін жаңа технологиялар мен инновациялық ұсыныстар қажет. Бұл ғылымсыз мүмкін емес, — деп атап өтті Шәкәрім университетінің ректоры Бауыржан Ердембеков.
Ал Қоғамдық кеңес мүшесі Николай Исаев облыс орталығы мен ауылдық жерлердегі қоғамдық көлік мәселесіне тоқталды.
— Әлеуметтік бағыттар субсидиялануы керек. Бірақ аудандық бюджеттерде бұл үшін қаражат әрдайым жеткіліксіз. Қазіргі уақытта Семейдегі тасымалдау мәселесі шешілуде. Біз автобустарды толықтай электрондық билет жүйесіне енгізуге қол жеткізіп жатырмыз. Себебі қоғамдық көлікті субсидиялау үшін біз жолаушылардың нақты санын, әлеуметтік категорияларын білуіміз керек,- деді Николай Исаев.
Сонымен қатар газдандыру мәселесі де көтерілді. Себебі Абай облысы мен ШҚО бөлінгеннен кейін газдандыру мәселесі қайта қарауды талап етеді.
Кездесу барысында өзге де сұрақтар қаралып, шешу жолдары талқыланды.
Абай облысының әкімдігі
