Дүйсенбі күні шаһар басшысы Айбек Кәрімов Облыстық аурухананың аумағында салынып жатқан хоспис ғимаратының құрылысымен танысты. Сонымен қатар, Айбек Мүталапханұлы биылғы жылы ағымдағы және күрделі жөндеуден өтіп жатқан көшелердің де жай –күйін, жүргізіліп жатқан жұмыстардың барысымен танысты. Жалпы, қала көшелерін қалыпқа келтіру шаһар басшысының үнемі назарында десек те болады.
Хоспис ғимаратын салу – уақыт талабы. Себебі, бұған дейін қызмет еткен «Қызыл крест» ұйымына қарасты аурухананың тозығы жеткен. Ондағы арнайы күтімді қажет ететін науқастар үшін жасалған материалдық мүмкіндіктің заман талабына сай келмейді.
— Қаламыздағы «Қызыл крест» ұйымына қарасты аурухана 30 жылдан бері қызмет көрсетіп келеді. Өкінішке орай, ол ауруханадағы жандар үшін ешқандай әлеуметтік- материалдық жағдай жасалмай отыр. Сондықтан, аурудан айығуларына үміт болмаса да, өмір сүруге талпынған науқастар үшін оңтайлы жағдай жасалуы керек. Қаламызға ирландиялық «Чернобыльдан да маңызды іс» қайырымдылық қорының төрайымы Фиона Коркоран іссапармен келгенде ойымызды ортаға салдық. Біздің бастамамызды қолдаған ирландиялықтар қаржылай қолдау танытты,- дейді қала әкімдігінің жанынан құрылған қоғамдық кеңестің төрайымы Жанна Жибраева.
Хоспис ғимаратын салу мәселесі қала әкімдігінің жанынан құрылған қоғамдық кеңесте бірнеше мәрте талқыланып, уақытында қолдау тапқан соң, ғимарат құрылысы ирландиялық «Чернобыльдан да маңызды іс» қайырымдылық қорының көмегімен қолға алынған. 30 орынға арналған хоспис ғимараты 2011 жылы басталған. Мердігер мекеме «Семей-Отдел Строй» ЖШС. Бүгінгі таңда төрт кезеңнен тұратын жұмыстың үш кезеңі аяқталған. Қаржының тапшылығына байланысты кешіктірілген құрылыстың төртінші кезеңіне облыс әкімі Бердібек Сапарбаев облыстан қаржылай демеу болып, қала әкімі Айбек Кәрімов әкімдік тарапынан қолдау танытып отыр. Ғимарат құрылысының қарқыны қала басшысының назарында. Мердігерлердің айтуынша, биыл құрылыс жұмыстары аяқталып, нысан қолдануға берілмек.
{jcomments on}- Хоспис ғимараты Ирландияның қайырымдылық қорының көмегімен салынып жатыр. Жобалық-сметалық құжат бойынша нысан құрылысы 45 млн. теңгеге жоспарланған. Қазіргі таңда 30 млн. теңгенің қаржысына құрылыс жұмыстары жүргізілді. Қаржы кезең-кезеңмен бөлініп отырғандықтан жұмыс созылып кетті. Құрылысты аяқтау үшін 15 млн. теңге қажет еді. Ирландиялық ұйымының төрайымы Фиона Коркоран облыс әкімі Бердібек Сапарбаевпен кездесуі кезінде бұл мәселе талқыланып, өңір басшысы қалған қажетті қаражатты облыстық бюджеттен бөлінуіне ықпал етті. Енді жұмыстың қарқынын арттырып, жылдың соңына дейін нысанды қолдануға береміз,- деді мердігер мекеменің өкілі Нұрлан Жүнісов.
Нысанды аралап, құрылыс қарқынын байқаған қала басшысы мердігер мекемеден шешілмеген қандай мәселе бар екендігін сұрады. Мердігерлердің айтуынша, айтарлықтай күрделі мәселе жоқ. Тек су мен кәріз мәселелерін жолға қою керек. Айбек Кәрімов нысанның болашақта халық игілігі үшін қызмет атқаратынын айта келе, әкімдік тарапынан коммуникация мәселелерін шешу жолында қолдау болатынын атап өтті.
Әлбетте, жаңа хоспис қолданылуға берілсе, халық игілігіне жасалған тағы бір игі шара болар еді. Жанна Жағыпарқызының айтуынша, жаңа ғимарат қолданылуға берілсе, «Қызыл крест» ұйымына қарасты аурухананы да жөндеуден өткізу ойда бар екен. Бірақ, бұл уақыттың еншісінде.
Қала басшысы келесі ретте жөндеу жұмыстары жүргізіліп жатқан Мичурин, Дальняя, Шымкент көшелеріне барды. Мичурин көшесінің күрделі жөндеу биыл басталған. Ол үшін қала бюджетінен 900 млн. теңге бөлінген. Жөндеу жұмыстары екі жылға жоспарланған. Көшенің жалпы ұзындығы 5 шақырым болса, оның екі шақырымын кеңейтіп, төрт жолақты жол жасау жоспарда бар. Бұл бөлік қараша айының соңында дайын болмақ. Көшенің қалған бөлігі келер жылы қолға алынады. Сонымен қатар, көшелерді жөндеумен қатар, оны жарықтандыру, маңын көгалдандыру, аялдамалары мен тұрақтарын реттеу де көзделіп отыр. Жөндеу жұмыстарын «Семей жолдары» ЖШС жүргізуде. Дальняя көшесінде аталмыш мердігер компанияның екі бригадасы мен 10 бірлік техникасы асфальт төсеу жұмыстарымен айналысуда.
