9 қараша, сәрсенбі күні Абай музейінде қазақ телевизиясында 47 жыл қызмет атқарған белгілі журналист Нұртілеу Иманғалиұлының 70 жылдығына арналған «Бай-қуатты болайық!» көрмесінің ашылуы өтті. Аталған шараға Абай облысы Қоғамдық даму басқармасының басшысы А.Садырбаев, Мәдениет, тілдерді дамыту және архив ісі басқарамасы басшысының орынбасары Н.Идрисова, ғалым, профессор, филология ғылымдарының докторы А.Еспенбетов, «Семей» телеарнасының басшысы Х.Советханұлы, Н.Иманғалиұлының жұбайы Қ.Советбекқызы, облыстың зиялы қауым өкілдері мен жас журналистер қатысты.
Бірнеше буын журналистерді тәрбиелеп, отандық тележурналистиканың дамуына зор үлес қосқан талант иесіне арналған көрмеге белгілі тележүргізушінің эфирде киген киімдері, жеке қолжазбалары мен жұмыс үстеліндегі бұйымдар, мерекелік және мемлекеттік наградалары, телефондары мен домбырасы сынды 200-ге тарта заттары қойылған. Телевизия тарланы көзі тірісінде «70-ке шықсам, ел аралап, «Бай-қуатты болайық!» деп көрме қоямын» деген екен. Әр хабарында айтатын «Бай-қуатты болайық!» деген бір ауыз сөзі алаш баласының жадында жатталып қалғаны анық. Сол себептен де журналистің өмірі мен шығармашылығынан сыр шертетін көрменің басқалай аталуы мүмкін емес еді. Бұл туралы оның жүзеге аспай қалған арманын орындаған өмірлік жары Қарлығаш Табулдинова айтып өтті.
— Көшпелі көрме көктемде Астана қаласындағы Ұлттық музейде басталды. Алматы, Шымкент, Атырау, Ақтау сынды мегаполистерде болып, міне, Семей қаласына да келіп тұрмыз. Көрмені қасиетті қара шаңырақ Абай музейінде қою себебіміз Нұртілеу ағаларыңыз, өздеріңіз білетіндей, барлық хабарларында Абайды көп насихаттады, Абайға жүгінді, Абаймен тұжырымдады. Семейдің зиялы қауым өкілдерімен осы музей қабырғасында «Бай-қуатты болайық» хабарларын да жазған болатын. Сондай-ақ Нұртілеу бұл көрмені жоспарлаған кезде өзінің шығармашылық байланысы болған қалаларды қамтуға тырысты. Біз журналистің арманын орындап, еліміздің патша көңіл көрерменіне, барша қызығушылық танытушылар мен болашақ журналистерге қолданған заттары тәлім-тәрбие болсын деген мақсатпен көрме ұйымдастырудамыз, — дейді Қарлығаш Советбекқызы.
Жарты ғасырға жуық өмірін қазақ телевизиясының дамуына арнаған журналистің ақындық қасиетін біреу білсе, біреуге беймәлім. Халық ақынының баласы болса да, өз ақындығын насихаттамаған Нұртілеу Иманғалиұлының 100-ден артық өлеңі бар. Келешекте кітап болып шығуы да мүмкін қолжазбалар – көрменің ең құнды жәдігерлері.
Іс-шара барысында Нұртілеу Иманғалиұлының көзін көрген зиялы қауым мен шәкірттері ыстық лебіздерін білдіріп, музей директорының орынбасары Мейрамгүл Қайрамбаева көрме ұйымдастыруға мұрындық болған жұбайына алғысын жеткізіп, сый-сияпаттар табыстады. Сондай-ақ Ә.Қашаубаев атындағы облыстық филармонияның дәстүрлі әншісі Гүлмира Ноғайбаева әсем әнімен кештің сәнін келтірді.
Қазақстан Республикасының мәдениет саласына еңбек сіңген қайраткері, Қазақ ұлттық өнер академиясының профессоры, журналистика ардагері Нұртілеу Иманғалиұлының қоғамдағы рөлі мен сіңірген еңбегін жұртшылыққа насихаттап, журналистика қайраткері жайлы естеліктерді бөлісу, жас ұрпақ бойында патриоттық рух қалыптастыру мақсатын көздеген «Бай–қуатты болайық!» көрмесі қарашаның соңына дейін көрермен назарына ұсынылатын болады. Бұдан кейін қазақ журналистикасы мэтрінің мерейтойына арналған бұл көрме Нұртілеу Иманғалиұлының туған өлкесі Жетісу облысындағы Талдықорған қаласында тарихи-өлкетану музейіне қойылмақ.
Дана ТАЛҒАТБЕК,
«Семей таңы»
