Жаңа оқу жылының басталуына да санаулы күндер ғана қалды. Ата – аналар әбігерде. Мектеп формасын, оқу құралдарын түгендеп, баласын қатарынан қалдырмауға тырысуда. Алайда, тұрмыстық жағдайы төмен, әлеуметтік аз қамтылған отбасылар жаңа оқу жылы басталар тұста қолында барын жеткізе алмай жататын кездері жиі кездеседі. Осы ретте республикалық деңгейде жыл сайын өткізілетін «Мектепке жол» акциясының тигізер пайдасы зор. Атымтай жомарт, қолында бар азаматтар мен тасы өрге домалап, әлеуметтік жауапкершілікке үлес қосып жүген кәсіпорын басшылары осындай сәттерде қолында барымен бөліседі. Осы орайда Семей қаласындағы бірқатар кәсіпорын басшылары өткен аптада акция аясында мектеп жасындағы балаларға базарлық жасағанын айта кету керек.
«Жанұя орталығы» қоғамдық қорының бастамасымен ұйымдастырылған «Мектепке жол» акциясы балғындарды мектеп қажеттіліктерін қанағаттандыру ісіне атсалысып отыр.
Қайырымдылық шараға Семей қалалық әкімдігінің қоғамдық кеңес төрайымы Жанна Жибраева, «Жанұя орталығы» қоғамдық қорының атқарушы директоры Людмила Асташкина, Семей қалалық қос мұнаралы орталық мешіттің наиб имамы Серікқали Нұржақыпов, бірқатар кәсіпорындар, шаруашылық серіктестіктердің және оқушылар мен олардың ата – аналары қатысты.
Акцияның негізгі мақсаты — әлеуметтік жағынан аз қамтамасыз етілген, көп балалы жанұялардың баларына, сондай-ақ, ата — анасының қамқорлығынсыз қалған жасөспірімдерге жаңа оқу жылының басында қолдау көрсету. Акция – әлеуметтік мұқтаж жандарды, оның ішінде балаларды жылы жүрек пен мейірімділік шуағына бөлейтіні анық.
Аталмыш акция аясында осындай иглігі мол істі «Жанұя орталығы » соңғы төрт жылдан бері жүзеге асырып келеді. Ұйымдастырушылардың айтуынша, жылдан — жылға шараның ауқымы кеңеюде. Өткен жылы 40 жанұяға акция аясында қолдау көрсетілсе, биыл 600 мың теңге қаражатқа елуден аса отбасының балаларына мектепке қажетті құрал – жабдықтар, киім – кешек берілген. «Жанұя орталығы» қоғамдық қорының атқарушы директоры Людмила Асташкина қолға алынған істің жүзеге асуына көмектесіп, бала тағдыран бей – жай қарай алмайтын, сондай –ақ, қаржылай демеушілік жасаған қаламыздағы бірқатар кәсіпорындар мен жеке шаруашылық серіктестіктерін атап, басшыларына алғыс айтты.
Өз кезегінде сөз алған Жанна Жағыпарқызы оқушыларды жаңа оқу жылының басталуымен құттықтап, жаңа оқу жылында тек «өте жақсы» деген бағаға білім алсын деген тілегін білдірді.
{jcomments on}- Қиыншылық пен кедергілер, яғни, тағдыр сыны – барлық отбасында кездесетін жағдай. Ең бастысы, бәріне беріліп, әлсіздің танытпай, сол сыннан сүрінбей өтіп, кездескен қиыншылықтарды жеңе білу керек. Бүгін мұнда жиналған қоғамдағы жағдайға бей-жай қарамайтын азаматтар әрқашан сіздерге қол ұшын созуға әзір. Сондықтан, еңселеріңізді тік ұстап, балаларыңызға үлгілі тәртіп пен тағлымды тәрбие берулеріңізге тілектеспіз,- деді Жанна Жибраева.
Елбасымыз Н.Назарбаев ертеңгі ел тұтқасын ұстайтын азаматтардың мектеп партасында отырғандығын айтып, бәсекеге қабілетті болу үшін білімді, денсаулығы мықты ұрпақ тәрбиелеу керектігін айтқан. Асыл дінімізде де дәл осы ой көрініс табады. Бұл орайда жиылған қауымға ақпарат беріп өткен Семей қалалық қос мұнаралы орталық мешіттің наиб имамы Серікқали Нұржақыпов ең алғаш түскен Құранның өзі «оқы» деген сөзден бастау алғандығын айтты. Сонымен қатар, ол өзге тіршілік иелерінен адамзат баласының басты айырмашылығы – барлық адамзат баласын бауырым деп сүйетіндігі екендігін тілге тиек етті. Бір адамның өзге жанға қолғабыс етуі, жәрдем беруі сауапқа жазылатындығын айтты. Акцияда бүлдіршіндерді қуантқан азаматтар екі есе сауап алғандықтарын жеткізді.
Жиын соңында акцияға демеушілік етуші «Машина құрылыс завод» АҚ, «Семспецснаб» ЖШС, «Саланг» ЖШС, «Банк Центр Кредит» АҚ, «Ибраев + К» өндірістік кооперативтерінің өкілдері сөз алып, балаларға базарлықтарын таратты.
Әйгерім СӘРСЕНҒАЛИ,
«Семей таңы»
