Тәжікстан астанасы Душанбе қаласында аралас жекпе-жектен өткен Азия чемпионатында күтпеген жағдай болды. Ақтық сынға шыққан екі қазақ қызы бір-бірімен күш сынасып, өнер көрсетуден бас тартты, деп хабарлайды Экспресс К.
Чемпионатқа Азияның 22 елінен келген 500-дей спортшы қатысты. Қыздар арасындағы доданың финалында екі қазақ қызы күш сынасу керек болатын. Алайда спортшылар бас тартты. Яғни, Түймегүл Жүніс шымкенттік әріптесі Қымбат Ахметке жол беріп, жеңіс сыйлады. Осылайша отандастарымыздың бірі жарыстың чемпионы атанса, екіншісі 2-орынды иеленді.
Марапаттау рәсімінің видеосын ТікТок-тағы парақшасында жариялады.
Айта кетейік, 47 келі салмақ дәрежесінде өнер көрсетіп жүрген спортшы Қымбат Ахмет Шымкент қалалық Полиция департаментінің жылдам қимылдайтын арнайы жасағының инспекторы.
Чемпионат қорытындысы бойынша Қазақстан құрамасы командалық есепте 2-орынды иеленді. Отандастарымыз қоржынға 7 алтын, 8 күміс және 10 қола медаль салды.
