15 қарашада еліміз бойынша 700-ден астам колледж алғаш рет Жұмыс берушілер күнін атап өтті. Іс-шараға ірі компаниялардың, шағын және орта бизнестің 4 мыңнан астам өкілі қатысты. Техникалық және кәсіптік білім беру ұйымдары жұмыс берушілермен 600-ден астам меморандум мен 500-ден астам ынтымақтастық туралы келісімге қол қойды.
Дана ТАЛҒАТБЕК,
«Семей таңы»
Ал Семей қаласында бұл күні Бизнес және сервис колледжінде Абай облысы бойынша «Атамекен» кәсіпкерлер палатасы өкілдігі мен облыстық білім басқармасының бірлесе ұйымдастыруымен жұмыс берушілер форумы өтті. Іс-шараға облыстың мемлекеттік органдарының, бизнес және оқу орындарының өкілдері қатысты. Серіктестер диалогі шеңберінде өткен форум Абай облысының инновациялық дамуында сұранысқа ие кадрларды даярлау және түлектерді жұмысқа орналастыруда жұмыс берушілермен ынтымақтастықты кеңейту мақсатында өткізілді.
Іс-шара колледж фойесінен басталды, онда қонақтар назарына бизнес және сервис колледжі студенттерінің шығармашылық жұмыстарының көрмесі ұйымдастырылды. Форум аясында «Жас маман» бағдарламасы бойынша жабдықталған шеберханалар, зертханалар, оқу кабинеттеріне экскурсия ұйымдастырылды.
— 15 қараша Қазақстанда Жұмыс берушілер күні болып жарияланды. Соған орай біздің колледжде бірқатар іс-шаралар ұйымдастырылды. Атап айтсақ, жұмыс берушілермен кездесу, бізбен байланыста жұмыс істейтін кәсіпорындардың қызметкерлерінің және оқытушылардың қатысуымен ашық сабақтар өтті. Жұмыс берушілер студенттерге шеберлік сабақтарын өткізіп, кеңестер берді, — дейді колледж директоры Альмира Қожанова.
Форум барысында дуальды оқыту мәселелері, оның маңыздылығы және кадрларды даярлаудың тиімділігі талқыланды.
— Дуальды оқыту жүйесі – бұл әлемдік тәжірибеде қолданылатын, маманды нақты өндіріске даярлауға мүмкіндік беретін үрдіс. Оқу процесінің 60 пайызы тәжірибелік жұмысқа, 40 пайызы теориялық сабақтарға арналады. Екі жақты ынтымақтастықтың арқасында студенттер теорияны практикамен ұштастырып, таңдаған мамандығын жұмыс орнында тікелей үйренеді. Яғни кәсіпорындар өз қызметкерлерін оқытуға және үздік студенттерді жұмысқа алуға мүмкіндік алады. Бұл біздің нарыққа еңбекке қабілетті кадрлардың шығуына септігін тигізеді, — дейді Абай облысы кәсіпкерлер палатасының директоры Әлия Жүрсімбаева.
Қазіргі уақытта 1339 ынтымақтастық туралы келісімге қол қойылды, оның 306-сы кәсіпорындармен және 29-ы колледждермен жасалған.
Форум аясында жұмыс берушілер, оның ішінде «Семей Көркем», «Семей құрылыс материалдары», «АЭС Шүлбі СЭС» серіктестіктері, «Қазақстан су жолдары» республикалық кәсіпорнының Семей филиалы және басқа да ұйым басшылары сөз сөйлеп, дуальды оқыту бойынша өз тәжірибелерін бөлісті.
— Дуальды оқыту жүйесін енгізгеннен бері біз Бизнес және сервис, Электротехникалық колледждермен өте тығыз байланыстамыз. Кәсіпкерлерді қолдап жатқандарыңызға үлкен алғысымды білдіремін. Бүгінде көп жұмыстар атқарылып жатыр. Осы байланысымызды ары қарай да жалғастыра беруге ниеттіміз. Басқа да колледжер бізге қажетті мамандарды даярлайтын болса, бірге жұмыс істеуге дайынбыз, — деді «Семей Көркем» ЖШС басшысы Арман Ахметқанов.
Жұмыс берушілер форумы аясында алғаш рет Абай облысы «Атамекен» кәсіпкерлер палатасы мен облыс колледждерінің директорлар кеңесі арасында ынтымақтастық туралы меморандумға қол қойылды.
