17 қараша күні бүкіл әлемде шала туған балалар күні аталып өтеді. Бұл күн алғаш рет Венада 2009 жылы аталып өтті. Бір жыл бұрын, 2008 жылы, Қазақстан Дүниежүзілік денсаулық сақтау ұйымының шала туылған нәрестелерді күту жөніндегі бағдарламасына қосылды. Осы ретте қаламыздағы облыстық перинаталдық орталығында БАҚ өкілдеріне экскурсия жүргізіліп, «Қамқорлық» оңалту орталығында ашық есік күні өтті.
Дана ТАЛҒАТБЕК,
«Семей таңы»
Өкінішке қарай, ананың уақытына жетпей босану жағдайлары елімізде әзірге азайған жоқ. Бірақ бұл шешілмейтін мәселе емес. Көптеген адамдарда мерзімінен бұрын дүниеге келген балалардың ары қарайғы тағдыры мен денсаулығына байланысты сұрақтар туындайды. Әрине, жөргекте жетілуге тиісті бөпенің бабын табу оңай шаруа емес. Бұл ауыр жүк дәрігерлерге түседі. Қаламыздағы перинаталдық орталықтың неонатолог дәрігері Анар Қайдарованың айтуынша, орталықта жылына дүниеге келетін 8 мың нәрестенің 500-600-і мерзімінен ерте туған балалар екен.
— 17 қараша күні мерзімінен ерте туған нәрестелер күні. Жиырма екі аптадан бастап және ең төменгі салмақта — 500 грамнан жоғары сәбилерді күту тәжірибесі Қазақстанда 2008 жылдан бастап қолданыла бастады. Жалпы, бұл мереке уақытынан ерте туған нәрестелерге және олардың күтімі кезінде туындайтын барлық проблемаларға, сондай-ақ ананың жүктілік кезіндегі денсаулығы, эмоционалдық жағдайының тұрақты болуы сынды бірқатар факторларға әлеуметтің назар аударту мақсатында аталып өтеді. Ерте туған нәрестелер нәзік, денсаулықтары әлсіз және қоршаған ортаға бейімсіз болып келеді. Сондықтан да бұл нәрестелерді «ақ жапырақты нәрестелер» деп те атайды, — дейді Анар Қабдылкәрімқызы.
Статистика мәліметтеріне назар аударатын болсақ, әлем бойынша әрбір оныншы нәресте мерзімінен бұрын дүниеге келеді. Бұл балаларға аса ұқыптылықпен күтім жасап, жоғары технологиялық құралдарды қолдана отырып сапалы емдеу керек. Сондай-ақ шала туған шақалақтар біліктілігі жоғары медицина қызметкерлерінің ұзақ уақыт бақылауында болуы қажет.
Перинаталдық орталық дәрігерлерінің тәжірибесінде толыққанды күтім алып, дені сау, мықты болып өскен шала туған нәрестелер бар. — Мен 28 қыркүйек күні жүктіліктің 27-аптасында сәбиім 990 грамм болған кезінде босандым. Денсаулығымның сыр беруі ерте босануымның себебі болар. Арсенийді кювезде ұстап, 1,5 кг болған кезде шығарды. Қазіргі кезде салмағы 1 кг 830 грамға жетті, әлі екі аптадай орталықта болуымыз қажет. Перинаталдық орталықтың дәрігерлеріне айтар алғысым көп. Олар өз істерін жақсы білетін білікті мамандар, дәрігерлердің қолдаулары мен ықыластары біз үшін үлкен демеу болды. Орталық мамандарына мықты денсаулық пен жемісті еңбек тілеймін! — дейді мерзімінен бұрын дүниеге келген сәби Арсений Солодкиннің анасы Мария Солодкина.
Мерзімінен бұрын дүниеге келген нәрестелердің ағзасы толық жетілмегендіктен олардың қан айналымы әлсіз болады. Шала туған нәрестелерді өмірге бейімдеу үшін, елімізде сәбилердің қозғалыста болуына септігін тигізетін тоқыма бұйымдарын әзірлейтін «28 ілмек» клубы жұмыс істейтінін айта кетейік. Ақ халаттылар тоқыма киімдердің шала туған балалардың өсіп-жетілуіне пайдасы зор екені медициналық тұрғыда дәлелденгенін айтады. Қазіргі таңда облыстық перинаталдық орталық еріктілер құрған «28 ілмек» клубымен тығыз байланыста.
Сондай-ақ, Халықаралық шала туған балалар күніне орай, «Қамқорлық» оңалту орталығында мерекелік іс-шара өтті. Аталған шараға оңалту орталығынан түлеп шыққан бүлдіршіндер келіп, жас отбасыларға өз өнерлерін көрсетті. Айта кетелік, бұл орталықта қызмет алушылар төрт жыл бойы медициналық көмек алады.
