24 қараша күні қаладағы «Спартак» стадионының аумағында қыс мезгіліндегі төтенше жағдайлардың алдын алу және оларды жою жөніндегі іс-қимылдарға азаматтық қорғаудың мемлекеттiк жүйесiнің дайындығын тексеру мақсатында республикалық командалық-штабтық оқу-жаттығулары өтті.
Кербез ДУЛАТҚЫЗЫ,
«Семей таңы»
«Қыс — 2022» оқу-жаттығуының мақсаты – қысқы кезеңде болуы мүмкін төтенше жағдайлардың алдын алу және жою жөніндегі іс-қимылдарға азаматтық қорғаудың мемлекеттік жүйесінің басқару органдары мен күштерін дайындау, авариялық-құтқару жұмыстарына күш-құралдарды дайындыққа келтіру, жергілікті азаматтық қорғау қызметтерінің дайындығын тексеру, өзара іс-қимылдарды пысықтау. ҚР ТЖМ ұйымдық нұсқауларына сәйкес, Абай облысы Төтенше жағдай департаменті базасында жедел штаб құрылды. Оның құрамына облыстың азаматтық қорғау қызметінің, төтенше жағдай жөніндегі комиссияның өкілдері кірді.
— Жедел құтқару жасағында республиканың қосымша техникасы бар, алдағы уақытта 38 қосымша құтқару техникасы қатарға қосылады. Оқу-жаттығу екі күн өткізіледі. Оқу-жаттығудың негізгі мақсаты – облыс жолдарында, жылумен, сондай-ақ сумен жабдықтау нысандарындағы төтенше жағдайларға байланысты құтқару жұмыстарын жүргізуге дайындықты пысықтау. Бүгін біз арнайы техниканың дайындығын тексердік, олардың барлығы қазіргі уақытта қолданыста. Ауа райы жағдайларына байланысты республикалық, облыстық маңызы бар жолдар жолдарды жабылған кезде, ескертулерге қарамастан жолға шыққан азаматтар қолайсыз жағдайға тап болады, сондықтан құтқарушылар осындай іс-шараларды өткізуге мәжбүр, — дейді облыс әкімінің орынбасары Димитрий Гариков.
«Қыс — 2022» оқу-жаттығуы 3 кезең бойынша өткізілді: 1 оқу кезеңі – авариялық-құтқару құрамаларының сап түзеуі, 2 оқу кезеңі – Семей — Өскемен автожолында қолайсыз ауа райында жолаушыларды эвакуациялау. 3 оқу кезеңі зардап шеккендерге арналған жылыту және тамақтану пунктінде өтті. Қабылдау пунктінде құтқарушыларға демалуға, жылынуға және тамақтануға жағдай жасалған, сондай-ақ дәрігерлер зардап шеккендерге шұғыл медициналық және психологиялық көмек көрсете алады.
Оқу-жаттығудың сценарийі бойынша Абай облысының аумағында ай сайынғы нормадан жоғары қар жауып, солтүстік бағытта 15-20 м/сек екпінмен жел тұрды. Салдарынан Семей — Өскемен автожолында қиындықтар туындап, 45 түрлі техника жолаушыларымен бірге тұрып қалды. Абай облысы ТЖД және полиция департаментінің 112 және 102 құтқару қызметіне автомобиль жолындағы жағдай туралы хабарламалар түсе бастады. Құтқарушылар қар құрсауында қалып қойған көлік құралдарын шығару үшін авариялық-құтқару жұмыстарын жүргізді. «Семей» қонақ үйіндегі халықты уақытша орналастыру пунктіне 143 адам, оның ішінде 40 бала жеткізілді және 45 көлік эвакуацияланды.
Оқу-жаттығуға барлығы 51 техника мен жеке құрамнан 121 адам жұмылдырылды.
