23 қараша күні Семей қалалық жұмыспен қамту орталығы Әділет департаментімен бірлесіп әлеуметтік осал топқа жататын азаматтар — қандастар, алимент алушылар, мүгедектігі бар адамдар, жасына байланысты зейнеткерлер, сондай-ақ көп балалы және аз қамтылған отбасылардың құқықтық сауаттылығын арттыруға арналған кездесу өткізді. Кездесудің мақсаты –азаматтарға тегін заңгерлік кеңес беру.
Айтолқын САМАТОВА,
«Семей таңы»
Кездесу барысында халыққа «Адвокаттық қызмет және заң көмегі туралы» ҚР Заңының 26-бабына сәйкес тегін заң көмегін көрсету туралы ақпарат беріліп, түсіндіру жұмыстары жүргізілді.
— «Адвокаттық қызмет және заң көмегі туралы» ҚР Заңының 26-бабында азаматтарға көрсетілетін тегін заң көмегі туралы нақты жазылған. Құқықтық ақпарат беру түріндегі мемлекет кепілдік берген заң көмегін тегін алуға барлық жеке және заңды тұлғалардың құқығы бар. Жеке тұлғалар, ата-анасының қамқорлығынсыз қалған кәмелетке толмағандар, атап айтқанда алименттер өндіріп алу, зейнетақы мен жәрдемақылар тағайындау, ақтау, босқын немесе қандас мәртебесін алу, зорлық-зомбылық, адам саудасы, асыраушысының қайтыс болуынан келтірілген зиянды өтеу немесе жұмысына байланысты денсаулығына келтірілген зиянды өтеу туралы, сондай-ақ кәсіпкерлік қызметпен байланысты емес сұрақтар бойынша көп балалы отбасылар тегін құқық көмек ала алады,- деді Абай облысының Әділет департаменті басшысының орынбасары Жанболат Самашев.
Кездесу барысында заңгерлер мен жеке сот орындаушылар, жұмыспен қамту орталығының мамандары, нотариустар азаматтарды жеке қабылдап, сауалдарына жауап берді.
— Мен бүгін мамандардан атаулы әлеуметтік көмек алуға қатысты кеңес алдым. Жалпы, бүгін көптеген азаматтар заңгер мамандардан сұрақтарына жауап алып жатыр. Мұндай кездесулер халық үшін өте тиімді деп ойлаймын, — дейді Александра Дружина есімді қала тұрғыны.
