Семейдегі «Дизайн — Мебель» кәсіпорнының тауарлары тек Абай аймағының тұрғындарына ғана емес, республикаға да жақсы танымал. Бұл кәсіпорын дайындаған жұмсақ және корпустық жиһаздар сәндік және сапалық жағынан шет елдің атынан ат үркетін керемет брендтдік жиһаздарынан кем емес. Сондықтан да «Дизайн — мебель» фирмасының өнімдеріне сұраныс та жоғары.
«Дизайн — мебель» — тәуелсіздік жылдарының төл перзенттерінің бірі. Өз ісін бастауды енді қолға алған кәсіпкер Мақсат Сағатбеков 2001 жылы қаланың Жаңасемей бөлігіндегі Спартак көшесінде орналасқан цемент зауытының қараусыз қалған жатақханасын алдымен сенімді басқаруға, соңынан жеке меншікке алған. Апатты жағдайдағы ғимаратты өз күштерімен жөндеуден өткізген олар өнімдерін алғашқы жылдары «Рахат» сауда үйіндегі жиһаз салонында сатуды бастаған. Көп кешікпей қаланың Шәкәрім даңғылы бойында ашылған өз сауда үйлеріне көшкен. Ал осыдан бірнеше жыл бұрын Қаржаубай ұлы көшесінің бойынан үш қабатты, сән-салтанаты жарасқан ғимарат есігін айқара ашты.
Кез келген кәсіпорынның уақыт көшінен қалмауы ұйымдастырушыға байланысты екені сөзсіз. Мақсат Қалиханұлы Сағатбеков 1996 жылы Семей педагогика институтын сурет және сызу пәнінің мұғалімі мамандығы бойынша аяқтаған. Біраз жыл мамандығы бойынша жұмыс та істеген. Алайда ағаштан түйін түйетін шебер жас сол қабілетін кәсіпке айналдыруға бел байлайды. Оның бұл ойын жары Дина Сіләмбекқызы да қолдайды. Ырымшыл халықтың ұрпағымыз ғой, «Дизайн — мебель» деген атауда Мақсат пен Динаның және олардың қос бүлдіршіндері Диас пен Мирастың есімдерінің бас әріптерінің барын да көңілдеріне жақын санайды.
Көп кешікпей олар мекемелер мен мектептерге арналған қарапайым жиһаз шығаруды бастап кетеді. Шетелдік жиһаздардың бағасы шарықтап тұрған уақытта жергілікті тауар өндірушінің өнімі қолжетімділігімен де халыққа жақын болды.
Істі бастау да, оны тастамай алға сүйреу де оңай емес. Мақсаттың командасы нарықтың соқтықпалы–соқпақты жолдарында сан түрлі сынақты да бастан өткерді. Бірақ сынбады, шыңдалды. Қолға алған іске жауапкершілікпен қараудың нәтижесінде «Дизайн — мебель» шағын жиһаз шығаратын цехтан алып кәсіпорынға айналды. Жиырма жылдан астам уақыт ішінде кәсіпорын қанатын кеңге жайды.
Австрияның KRONOSHPAN фирмасымен бірлесіп қызмет атқару барысында тауарлары бұрынғыдан да әрлене түсті түсті.
Бүлдіршіндерге арналған, жатын бөлмесіне қажетті, кеңсеге арналған «Дизайн — мебельдің» жиһаздарын Талдықорған, Өскемен, Астана, Қарағанды қалаларынан да іздеп келеді.
Олар тек тапсырысты орындап қоймайды, дизайнерлері үйіңізге келіп жиһазды бөлмеде дұрыс орналастыру барысында кеңес те беріп, тіпті терезе перделері мен төсек жапқыштарды да дайындап береді. Бұл орайда тапсырыс беруші Дина Сіләмбекқызының талғамына сенім артады.
Жергілікті кәсіпорындардың көш басында келе жатқан «Дизайн — мебель» тұтынушыларын әлі де әдемі тауарларымен қуанта береріне күмән жоқ. Жұмыс беруші, салық төлеуші кәсіпорынның жұмысына табыс тілейміз.
Жадыра ТӨЛЕГЕНҚЫЗЫ,
«Семей таңы»
