Елімізде жыл сайын қараша айының үшінші жексенбісінде Ауыл шаруашылығы және өнеркәсіп қызметкерлері күні атап өтіледі. Ауыл шаруашылығы қызметкерлерінің төл мерекесі – тоқтылық пен молшылықтың тойы. Бұл — қара жерді баптап, дән сеуіп, ала жаздай еңбек еткен диқандардың еңбегі еленетін күн.
Ауыл шаруашылығы және өнеркәсіп қызметкерлері мерекесі Абай облысының орталығы Семей қаласында да жоғары деңгейде өтті.
Зарина Кәп
«Семей таңы»
Мерекелік іс-шараға облыс әкімінің орынбасары Димитрий Гариков, Абай облысы Ауыл шаруашылығы және жер қатынастары басқармасының басшысы Анзор Абаев, Ветеринария басқармасының басшысы Ержан Барышев, ауыл шаруашылығы саласына жетекшілік ететін барлық аудан әкімдерінің орынбасарлары, сондай-ақ Абай облысының «Атамекен» өңірлік кәсіпкерлер палатасы және Қазақстан фермерлер қауымдастығының өкілдері қатысты.
Салтанатты шарада ауыл шаруашылығын дамытуға үлес қосқан облыс азаматтарына құрмет көрсетіліп, түрлі марапаттар тапсырылды. Ауыл шаруашылығы тауарын өндірушілер мен ауыл шаруашылығы мамандары «Еңбек ардагері» медалімен, «Ауыл шаруашылығы саласының үздігі» төсбелгісімен, ауыл шаруашылығы министрі Ербол Қарашөкеевтің құрмет грамоталарымен, сондай-ақ облыс әкімі Нұрлан Ұранхаевтың алғыс хаттарымен марапатталды.
Қонақтар ауыл шаруашылығы жануарларының, ауыл шаруашылығы техникасының, тыңайтқыштардың, тұқымдардың көрмесін тамашалады.
Ауыл шаруашылығы жануарларының көрмесіне облыстың ауыл шаруашылығы тауар өндірушілерінің өнімдері қойылды.
— Бүгінгі мерекеге қатысқанымызға өте қуаныштымыз. Көрмеге өз өнімдерімізді әкелдік. Біздің кәсіпорынның ашылғанына 2 жылдың көлемі болды, қазіргі таңда біздің өнімдеріміз тек қалалықтарға ғана таныс. Болашақта облыстық деңгейге шығуды мақсат етіп отырмыз.Сондықтан біз үшін үлкен мүмкіндік туып отыр. Осы көрме арқылы өнімімізді жарнамалай аламыз деп ойлаймын,- дейді Семей қаласындағы «SemeyQus» ЖШС өкілі Бибігүл Нұрсағатова.
— Абай облысы құрылғылы алғаш рет өтіп жатқан ауыл шаруашылығы еңбеккерлерінің мерекесіне Үржар ауданы киіз үй тігіп, арнайы көрме алып келді. «Үржар Арыстанбек», «Абылай», «Владик» сынды шаруа қожалықтары да көрмеге өз өнімдерін әкелді,- дейді Үржар ауданының кәсіпкерлік және ауыл шаруашылығы бөлімінің басшысы Ерзат Болатов.
Азық – түлігін молынан қамдап, қыс маусымына сақадай-сай отырған Абай еліндегі тойдың көрігін жергілікті өнерпаздар қыздыра түсті. Салтанатты жиын соңы әсем әнмен, күмбірлеген күй, мың бұралған бимен өрнектелді.
