Балалар жылына орай, жас ұрпақтың денсаулығын нығайтуға, салауатты өмір салтын насихаттауға арналған шаралар біздің қаламызда да көптеп өтуде. Соның бірі — 26-27 қараша күндері ITF таэквондодан өткен қаланың ашық біріншілігі. Турнирге облысымыздың Семей, Курчатов қалаларынан, Көкпекті, Бесқарағай, абай аудандарынан 100-ден аса 8-9 және 10-11 жас аралығындағы балалар қатысты.
Дана ТАЛҒАТБЕК,
«Семей таңы»
Таэквондода спортшының аяғы мен қолы қатар жұмыс істейді, мақсаты – жарыс ережесіне сай келетін әдістерді пайдалана отырып жеңіске жету. Таэквондошы — не нәрсені де ойланып барып істейтін өзіне сенімді, салқынқанды, сабырлы болуы керек,. Семей қаласының дене шынықтыру және спорт бөлімі басшысының міндетін атқарушы Бауыржан Дюсенбаев бұл спорт түрінің дамуына қалада жақсы көңіл бөлініп отырғанын айтып, жарысқа қатысушыларға құттықтауын жолдады.
- Барлықтарыңызды ашық біріншіліктің басталуымен құттықтаймын! 1998 жылдан бері балалар арасында салауатты өмір салтын және спортты насихаттау мақсатында өткізіліп келе жатқан таэквондодан қала біріншілігі биыл да өз жалғасын тапты. Жарысқа қатысушы командаларға сәттілік тілеймін! — деді Бауыржан Тұрарбекұлы.
«Jýsan Bank» өкілдері де осы сайысқа іс-шараға қатысты.
- Біз – турнирдің демеушілеріміз. Бұл спорт түрін дамытудағы ең басты мақсатымыз – балаларымыздың уақыттарын бос өткізбей, спортқа жақын болып, салауатты өмір салтын ұстанып өсулеріне қолдау көрсету. Дені сау ұрпақ – біздің болашағымыз. Сондай-ақ біз жүлделер ұтыстарын өткіземіз. Балаларына қолдау көрсетуге келген ата-аналарға жарыс өтіп жатқан кезде жүлде ұтып алуға мүмкіндік жасап отырмыз, — дейді қаламызда аталған спорт түрінің дамуына үлес қосып жүрген «Jýsan Bank» бөлшек бизнес бөлімі директоры Азат Құсайынов.
Турнирді ұйымдастырушы — Абай облысы Таэквондо федерациясының президенті, ҚР еңбек сіңірген жаттықтырушысы, жетінші дан иегері Махаббат Советхан барлық спортшылардың жақсы дайындықпен келгенін атап өтті.
Жарыс қорытындысы бойынша, жалпыкомандалық есепте І орынды Семей қаласының командасы жеңіп алса, ІІ орын Көкпекті ауданының, ІІІ орын Бесқарағай ауданының спортшыларына бұйырды.
Жеңімпаздар мен жүлдегерлер Семей қаласының дене шынықтыру және спорт бөлімінің медальдарымен және грамоталарымен марапатталды.
