«Жылукоммунэнерго» мекемесі қала бойынша жылу маусымына қызу дайындық жүргізіп жатыр. Алайда, бұл жұмыстарға қол байлау болып отырған мәселелер де жоқ емес. Қазіргі басты мәселе тұтынушылардың жылу үшін қордаланып қалған қарыздары. Дегенмен, бұл бағытта бүгінгі күні қатаң шаралар қолға алынған.
Апта басында «Жылукоммунэнерго» мамандары учаскелік полиция және сот орындаушыларымен бірге жылуға қарызы қомақты пәтерлерге барды. Қазынаға түспеген қаржыны өндіру үшін бұл рейдтің аз да болса пайдасы болуы мүмкін.
Жылуға қарызы қордаланып қалған үйдің бірі — Цементшілер кентіндегі Би-Боранбай көшесінің тұрғындары. Арнайы топ жұмысын осы жерден бастады. Жалпы, семейліктердің жылуға деген қарызы бүгінгі күні 395 миллион теңгені құрайды. Ал дебюторлық қарыз мөлшері 500 миллион теңгеге жеткен. Оның 129 миллион теңгесі заңды тұлғалардың, қалғаны тұрғындардың еншісінде екен. «Бүгінгі күні «Жылукоммунэнерго» кәсіпорыны тарапынан қатаң шаралар қолданылуда. Ол бойынша пәтерлер жылудан ажыратылатын болады», — дейді «Жылукоммунэнерго» мекемесінің абоненттермен жұмыс бөлімінің бастығы Гауһар Жетпісбаева.
— Қазіргі кезде Цементшілер кентінде рейд шараларын жүргізіп отырмыз. Қарызы бар пәтерлерге жылудың ажыратылатыны туралы ескерту жасаймыз. Егер бес күннің ішінде қарыздарын төлемесе, қатаң шаралар қолданылып, жылу жүйесінен ажыратылады. Сондай-ақ, сот орындаушыларымен мүліктері тәркіленетін болады. Бұған қоса, абоненттер сот шешімінен жалтарғаны үшін ҚР Әкімшілік құқықбұзушылық Кодексінің 524-ші және 525-ші бабына сәйкес елу күнге дейін бас бостандықтарынан айырылады. Алдымен ескертеміз — келесі аптадан бастап жылу жүйесінен ажырата бастаймыз. Жалпы, Цементшілер кен-тінде тұрғындар арасындағы қарыз өте көп. Осы аудан бойынша абоненттер қарызы 40 миллион теңгеден асты. Бір ғана Би-Боранбай көшесі 45 «А» мекенжайында 300 мың теңге берешегі бар пәтерлер бар. Осы үйде 100 мыңнан астам берешегі бар бес абонент тұрады. Жұмыстарымызды да солардан бастап отырмыз.
{jcomments on}Жылу жеткізушілер алдымен аталмыш көшедегі 43, 45 «А», 45 «Б», 47-ші үйлерде болып, борышкерлерге ескерту жасады. Олардың айтуынша, алдағы уақытта қарызға батқандарға рейд шаралары күн сайын жүргізіледі. Айтпақшы, бұған дейін де қарызы барлардың жылу жүйесінен ажыратылған кездері болған.
— Жылу жүйесінен ажырату жұмыстарын шілде айынан бастап жүргіздік. Қазір тек қарызы бар жекелеген пәтер иелері ғана қалды. Қарыздың осынша мөлшері барын ескеретін болсақ, тұрғындар арасында ешқандай төлем жүргізілмей келеді деп айтуға болады. Ал, жылу маусымы болса жақын арада басталады. Бар болғаны бір айдан артық уақыт қана қалды. Тұрғындар арасында болса, қарызды жабуда ешқандай ілгерлеу байқалмайды, — дейді Гауһар Жетпісбаева. — Заңды тұлғалар арасында берешегі барларды жылудан ажыраттық. Енді тек пәтерлер ғана қалды. Бұлардың қатарында шағын дүкендер, шаштараздар бар. Оларды да жылу жүйесінен ажырататын боламыз.
Айта кетуіміз керек, жылу жүйесін кейін қайта іске қосуда абоненттер сот пен сот орындаушылар шығынын төлейтін болады. Жалпы айтқанда, тұтынушылар қарыздарының үстіне мөлшері елу пайызға дейін қосымша қаражат төлейді.
Асан Мырзаханов,
«Семей таңы»
