2 қараша күні Абай облысында жан түршігерлік қайғылы оқиға болды. Қонақтан шыққан ерлі зайыпты ата мен апа және олардың кішкентай немересі көшеде суықтан тоңып, қаза тапты, деп хабарлайды Semeytany.kz
ABAI NEWS порталының мәліметінше, қайғылы оқиға Абай облысы, Жарма ауданы, Терістанбалы ауылында болған.
Жаңа отау құрған отбасы 3 жасар баласын ата-анасына әкеліп тастайды. Кейін оларды қонаққа шақырып, атасы мен әжесі кішкентай немересін ертіп барады.
Біраз уақыттан кейін қарт ерлі-зайыптылар қоштасып, баламен бірге далаға шығады. Кешкі аязда олардың неге сыртқа шығуға асыққаны әлі белгісіз.
Өкінішке орай, алдымен әйел құлап, суықтан тоңып өледі, одан кейін күйеуі қаза табады. Жергілікті тұрғындардың айтуынша, 3 жасар бала көшеде тоңғанынан қатты жылаған, алайда баланы да құтқару мүмкін болмаған.
Жарма аудандық полиция бөлімінде бұл деректі растады. Отбасын жерлеу рәсімі өтіп үлгерген.
Суық ауа райының басталуымен адамдардың үсік шалу жағдайлары жиілеп кетті, деп жазады дереккөз. Абай ауданындағы жедел жәрдем станциясының мәліметінше, облыста тоғыз адамды үсік шалса, оның алтауы Семейде. Сондай-ақ ауа райына сай келмейтін киімнің кесірінен бір жасар сәби мен бес жасар баланы да үсік шалған.
