Зағип жанға жарық дүниенің сұлулығын көруді жазбаған. Алайда көз жанарынан айырылған немесе көру қабілеті нашар адамдар да адамзат игілігі үшін тер төгеді. Тағдырына налымай, қоғам өміріне белсене араласып жүрген жандар аз емес. Сондай өмірі көпке үлгі жандардың қатарында Семей қаласындағы «Шамшырақ» клубының «Гауһартас» хор ұжымының әншілері де бар.
Зарина КӘП
«Семей таңы»
Биыл «Шамшырақ» клубының «Гауһартас» хор ұжымының халықтық атағын алғанына 15 жыл толды. Осыған айтулы мерекеге орай арнайы концерт ұйымдастырылды. Салтанатты шараға Абай облысы Семей қаласының мәдениет және тілдерді дамыту бөлімінің басшысы Маржан Бахатова, қалалық мәслихаттың депутаты, №7 емхана директоры Жаннат Молдағалиева, М.Төлебаев атындағы музыкалық училищенің оқытушысы Болат Распеков, хордың музыкалық жетекшісі Ермек Баяшев қатысып, құттықтау сөз сөйледі.
Зағиптар және нашар көретін азаматтарға арналған «Шамшырақ» клубының хор ұжымы 2005 жылы құрылған. 2007 жылы «Гауһартасқа» «Халықтық өнерпаз ұжым» атағы берілді. 2010-2013 жылдары хор ұжымы осы атағын қайта растап, ҚР Министрлігі сертификатына ие болды.
Мерекелік кеш барысында зағип және нашар көретін азаматтарға арналған массаж жасау бөлмесінің салтанатты ашылуы өтті.
— Бүгінгі іс-шара «Шамшырақ» клубының мүшелері «Гаухартас» хорының халықтық атағын алуына 15 жыл толуына арналып отыр. Хор ұжымы 15 жылда өсіп-өніп, қалалық, облыстық, республикалық фестивальдарға қатысып, жетістіктерге жетіп жүр. Тағы бір қуанышты жаңалығымыз — жапониялық агенттіктің демеушілігімен массаж жасайтын бөлме ашып отырмыз. Бұл бөлмеде қаладағы медициналық колледждерде, университетте оқитын зағип студенттер тәжірибе жинайтын болады,- дейді клуб меңгерушісі Марат Әлиасқаров.
«Гаухартас» хор ұжымы әуелете ән салып, көрерменнің ықыласына бөленді. Сахнада оқылған өлең мен шырқалған әндер арқылы зағип жандар өздерінің жан дүниесін жарық дүниеге жеткізіп, көпшілікті тамсантты. Зағип жандардың өнерге, өмірге деген құштарлығы кімге болса да үлгі боларлық. Бүгінгі қоғам «мүмкіндігі шектеулі» деп атайтын бұл жандар адамның мүмкіндігінде шек жоқ екенін дәлелдеп келеді.
