Республикалық «Абай» қорының қолдауымен Ұлы Абайдың даналық даралығын әр қырынан танытуға арналған «Әлемнің Абайы, Қазақтың дана ойы» атты жаңа жинақ жарыққа шықты.
«Өзен судың тұнығы», «Ұлы тойдың дүбірі», «Абайтану арналары» атты үш бөлімнен тұратын аталмыш кітапта Елбасы Нұрсұлтан Назарбаевтың «Абай туралы сөз» атты баяндамасы, сонымен қатар, Ғ.Шәкерұлы, Ә.Шәріпұлы, А.Тоқмағамбетов пен С.Бапиев және Ж.Жүнісжанов сынды бірқатар ғалымдар мен қаламгерлердің Ұлы Абайдың тұлғалық қасиетін айшықтайтын және ақынның данышпандығын танытып, дүниетанымын сипаттайтын түрлі баспасөз беттерінде жарық көрген ғылыми, танымдық мақалалары жарияланған.
Ал, кітаптың Алғы сөзін Қазақстан Жазушылар одағының мүшесі, Абай ауданының және Семей қаласының «Құрметті азаматы», «Құрмет» орденінің иегері Төкен Ибрагимов жазған екен. «Республикалық «Абай» қорының қолдауымен тағы бір толайым еңбек оқырман қолына тигелі отыр екен. Ұлы ақынның өлмес өсиеті, сөнбес сәулесі кеше де керек болған, бүгін де керек болды, ертең де керек екеніне өз басым кәміл сенемін. Олай дейтінім, отыз үш жыл Абайдың мемлекеттік тарихи-мәдени және әдеби мемориалдық қорық-мұражайын табан аудармай басқарған уақытта көзім жетіп, кірпіш дүниенің кетігін тауып қаланғанымды мерейлене айта аламын. Сондықтан, Абай туралы жазылған әр сөз, атқарылған әр іс назарымнан тыс қалып көрген емес. Бүгінгі еңбек те соның сүрлеуі сияқты»,- деп басталатын «Кешегі мен бүгінгінің кестесі» деп аталатын Алғы сөзде:
{jcomments on}«Ұлы Абайдың арғы ата-тегінен тармақталып, өскен ортасы, өнегелі өрісімен қоса, дүбірлеп өткен мерейтойлары жайлы жазбалар сонау бір ескі күндерден елес береді. Сол бір сауықты сәттерді қайта санаңа құяды.
Ту бастауында ұлы Әуезов тұрған бұл атаулы күндер әлемдік деңгейдегі 150 жылдық салтанатымен жарасымды тоқайласып, бауырын жаза түседі.
Қазіргі Көшбасшымыз Н.Ә.Назарбаевтың тікелей пәрменімен қапысыз жүзеге асқан мәнді мәдени шара-тәуелсіз елдің ең тұңғыш тойы екендігін дүние жүзіне паш еткендігі әлі күнге аңыз бен ертегідей айтылады. Осынау жарасым тапқан жақсы ырым қазақ мемлекетінің мәртебесін көтере түскен сан салалы салтанаттармен жалғасып жатқанын көзіміз көріп отыр. Абай рухы, Абай қасиеті, Абай шапағаты деп айтуға әбден сиып кеткендей. «Қазақ халқының иесі мен киесі» деп тегін айтпаса керек Елбасы»,- делінген.
Кітаптағы мақалаларды жинақтап, баспаға әзірлеген Республикалық «Абай» қорының президенті, Абайдың жиені, Абай ауданының және Семей қаласының «Құрметті азаматы», ҚР еңбек сіңірген қайраткері, Қазақстанның Құрметті журналисі Балтабек Ерсәлімов екенін де айта кеткен жөн. Ал, оқырман назарына ұсынылған аталмыш кітап та Балтабек Ерсәлімовтің «Әлем – жақсыларымен әдемі» атты мақаласымен қорытындыланған.
Жарыққа шыққан жаңа кітап студенттер қауымы, оқытушылар мен ұстаздар үшін таптырмас ғылыми еңбек ретінде де бағалауға лайық. Кітапқа жаны құмар жандар жаңа басылымды «Атамұра» кітапханасынан алып оқуына болады.
Нұрдәулет КӘКІШЕВ,
«Семей таңы»
