Қайырымдылық
5 желтоқсан күні Бизнес және Сервис колледжінде Семей қаласы әкімдігінің “Ішкі саясат бөлімі” ММ қолдауымен және Жастар ресурстық орталығының ұйымдастыруымен, Халықаралық волонтерлер күніне орай, “Кең жүрекпен” атты қайырымдылық кеші өтті. Іс-шараға ішкі саясат бөлімінің басшысы Олжас Соғымбай, колледж оқытушылары және студенттер қатысты.
Жадыра ТӨЛЕГЕНҚЫЗЫ,
«Семей таңы»
Өмірлерінің бір бөлігін қоғам игілігіне, мейірімділікке арнайтын еріктілерді бүгінгі күннің батырлары деуге болады. Олардың бойындағы қайырымдылық қасиет, жүректерінің кеңдігі – жастарға үлгі-өнеге. Жастар ресурстық орталығының мәліметінше, бүгінде Семей қаласында 30-ға жуық волонтерлік ұйым жұмыс істейді екен. Олардың көпшілігі — колледждер мен жоғары оқу орындарының студенттері.
— Құрметті волонтер жастар, Сіздерді 5 желтоқсан — Халықаралық волонтерлер күнімен құттықтаймын! Волонтерлік — кең жүректі азаматтардың ғана қолынан келетін іс. Өздеріңіз білетіндей, елімізде Мемлекет басшысының Жарлығымен волонтерлік қозғалысты дамытуға бағытталған көптеген іс-шаралар жоспары бекітілді. Абай облысының, оның ішінде Семей қаласындағы орта арнаулы кәсіптік-техникалық білім беретін колледждердің студенттері волонтерліктің «Асыл мұра», «Сабақтастық», «Таза әлем» бағыттары бойынша ауқымды жұмыстар атқарды. Жылдағы дәстүр бойынша, желтоқсан айының соңында «Жыл таңдауы» байқауында әр сала бойынша жемісті еңбек етіп жүрген үздік жастарды іріктеп, марапаттаймыз. Жылдың үздік волонтерін сіздермен бірге таңдайтын боламыз,- деді Олжас Соғымбай.
Кеш барысында аукцион ұйымдастырылып, жергілікті қылқалам шеберінің қолынан шыққан картина, Жомарт Рятовтың «Сапалы қазақ» атты киімдер топтамасынан күртеше мен футболка, Жансерік Қадырбаевтың «Менің роднойларым» атты кітабы, қөлөнер бұйымдары 15-20 мың теңге аралығында сатылды. Жиналған 100 мың теңге қаражат қайырымдылыққа жұмсалатын болады.
Кеш соңында қала әкімі Нұрбол Нұрсағатовтың алғыс хатымен «Адал ұрпақ» (Қайнар жоғары колледжі), «Жан жылуы» (Ж.Шайжүнісов атындағы Электронды колледж), «Біз бармыз» (М.Төлебаев атындағы музыка училищесі), «Мейірім» (М.О.Әуезов атындағы педагогикалық колледж), «Алтын жүрек» (Семей медициналық колледжі), «Үміт» (Семей жоғары көп салалы колледжі), «Қолдау» (Шәкәрім университеті), «Кең жүрек» (Агробизнес және экономика колледжі), «Ашық жүрек» (Авиценна жоғары медициналық колледжі), «Ашық жүрек» (Көлік колледжі), «Ашық жүрек» (Политехникалық колледжі), «Ақ ниет» (Д.Қалматев атындағы жоғары медициналық колледжі), «Ашық жүрек» (Innovative колледжі), «Доброволец» (Жоғары гуманитарлық-заң және техникалық колледжі), «Қайырымды студенттер» (Р.Байсейітов атындағы Семей қаржы-экономикалық колледжі), «Academy of Kindness» (Геологиялық барлау колледжі), «Ақниет» (Alikhan Bokeikhan University), «Ашық жүрек» (Индустрия-технология колледжі), «Ашық жүрек» (Электротехника колледжі) және «Y — PEER» еріктілер ұйымдары марапатталды.
