Абай кітапханасында «Жанұя» қоғамдық қоры мен Абай облыстық полиция департаментінің ұйымдастыруымен «Зорлық-зомбылықсыз 16 күн» акциясы аясында брифинг өтті. Іс-шараға құқық қорғау органдарының, ішкі саясат, білім бөлімдерінің өкілдері, журналистер мен еріктілер қатысты. Отбасының рөлін нығайту, зорлық-зомбылықтың жолын кесу, халықтың полицияға сенімін арттыру мен мақсатында ұйымдастырылатын дәстүрлі республикалық акция Абай облысының аумағында 25 қараша мен 10 желтоқсан аралығында өтуде.
Дана ТАЛҒАТБЕК,
«Семей таңы»
«Жанұя» қоғамдық қорының басшысы Людмила Асташкина аталған халықаралық акция 62 жыл бұрын пайда болғанын, бірақ 1991 жылы халықаралық мәртебеге ие болған кезден бастап дәстүрлі түрде барлық елдерде өткізіліп келе жатқанын атап өтті.
— Зорлық-зомбылыққа ұшыраған, бірақ бұл туралы айтуға қорқатын және айта алмайтын адамдарға сіздерді қорғай алатын құқық қорғау органдары бар екенін айтқым келеді. Бірақ қажетті шаралар қолданылғанымен, құқық бұзушы біраз уақыттан кейін қайтадан өз әдетіне салатын жағдайлар да баршылық. Сондықтан әйелдерді шынымен қорғай алатын жүйелі шаралар қабылдануы керек. Өкінішке қарай, қаламызда дағдарыс орталығы жоқ. Облыс болғаннан кейін бұл мәселелер облыс әкімдігінің, қоғам қайраткерлері мен жергілікті полиция қызметінің ықпалымен шешіледі деп ойлаймын. Зорлық-зомбылыққа ұшыраған адамдар мен олардың балаларына белгілі бір уақыт аралығына баспана болатын мекен керек. Бұл бағытта біз жұмыс істеп жатырмыз, — деді Людмила Асташкина.
«Аналар үйі» қоғамдық қорының үйлестірушісі Айнагүл Нұртазина да қандай да бір өмірлік қиын жағдайға тап болған балалы отбасылардың жағдайын жақсартуға бағытталған, балаларды қатыгездік пен зорлық-зомбылықтан қорғайтын дағдарыс орталығының қаламызда болуы керектігін алға тартты. Сондай-ақ ажырасу статистикасын азайту мақсатында отбасылық құндылықтарды қалыптастыру мен насихаттаудың, жалпы, отбасын құрудағы жауапкершілік пен оны сақтаудың маңыздылығын айтып өтті.
— Тұрмыстық зорлық-зомбылықтың алдын алу және оған қарсы іс-қимыл жүргізу, қоғамның полицияға деген сенімін арттыру мақсатында «Зорлық-зомбылықсыз 16 күн» акциясы өткізіледі. Бұл акция әйелдерге қатысты зорлық-зомбылықты жою бойынша халықаралық күрес күніне орайластырылған. Басты мақсаты – адамдарға отбасындағы проблемаларды жасырып, оған төзе беруге болмайтынын, құқық қорғау органдарынан көмек сұрау керек екенін түсіндіру. Осы акция шеңберінде Абай облысының полицейлері тұрмыстық құқық бұзушылық жасауға бейім, алкогольдік ішімдікті шамасынан тыс пайдаланатын адамдарды, сондай-ақ қолайсыз жағдайда өмір сүретін отбасыларды тұрғылықты жері бойынша тексереді, — деді Абай облысы полиция департаменті жергілікті полиция басқармасының аға инспекторы, полиция капитаны Мадина Асылханқызы.
Жиында айтылғандай, дыл басынан бері облыс аумағында отбасылық-тұрмыстық қатынаста құқыққа қайшы іс-әрекеттері үшін 1800-ден астам құқық бұзушы әкімшілік жауапкершілікке тартылған, отбасылық агрессорларға қатысты екі мыңнан астам қорғау ұйғарымдары шығарылып, 350-ден астам құқық бұзушының мінез-құлқына ерекше талаптар белгіленген.
Абай облыстық полиция департаменті азаматтарды тұрмыстық зорлық-зомбылықтың барлық фактілері бойынша «102» арнасына хабарлауға шақырады.
