Әлемдегі ең танымал спорт түрінің бірі шахмат – нағыз ақылдылардың ойыны. Шағын ғана шахмат тақтасы — ойыншылар үшін көптеген айла-тәсілді қолданатын соғыс алаңы. Бүгінде бұл ойын түрі елімізде қарқынды дамып келеді. Шахматшыларымыз Қазақстанның атын әлемге танытуда.
Өткен аптада Семейдегі «Арена» мәдени-спорттық кешенінде классикалық шахматтан Қазақстан Республикасының чемпионаты бастау алған болатын. Чемпионатқа 25 ойыншы қатысуда. Оның ішінде 3 гроссмейстер бар. Жарыстың бас ұйымдастырушысы – Қазақстан Республикасының Шахмат федерациясы.
Чемпионаттың салтанатты ашылу рәсімінде Абай облысы әкімінің бірінші орынбасары Айдын Кәрімов құттықтау сөз сөйлеп, спортшыларға сәттілік тіледі.
— Шахмат – нағыз мықтылардың ойыны. Мұндай сайыстың біздің қаламызда өтіп жатқанына қуаныштымын. Шын жүйрік жеңіске жетеді деп сенемін,- деді Айдын Мейрамбекұлы.
Классикалық шахматтан чемпионат елімізде бірнеше жыл қатарынан ұйымдастырылып келеді. Қатысушылардың жасына шектеу жоқ. Оқушылармен бірге ересек адамдар да сайысқа түсе алады.
— Турнирдің ерекшелігі де осында. Іріктеу кезінде қатысушылардың жасына қарамаймыз. Шын жүйрікке тұсау жоқ. Еске сала кетейік, бұл — шахматтан Қазақстандағы негізгі чемпионат. Оған ешкім де жайдан-жай келмейді. Абай облысында алдағы уақытта шахмат ойыны жақсы дамып, мықты ойыншылар шығады деген сенімдемін, — деді Шахмат федерациясының вице-президенті Александр Бабенко.
Жарысқа қатысушылардың басым бөлігі — 16-18 жастағылар. Барлығы жеңістен үмітті. Тіпті жарысқа дайындықты бірнеше ай бұрын бастап кеткен.
— Шахматпен 11 жасымнан айналысамын. Жарысқа жақсы дайындалдым деп ойлаймын. Әрбір қарсыласқа ерекше дайындалдым. Осыған дейін балалар арасындағы турнирлерге қатыссам, қазір Қазақстан чемпионатына қатысудамын. Жеңіске жету үшін бар күшімді саламын, — дейді Әбілмансұр Әбілқайыр.
Талшын ҚАЛИАСҚАР,
«Семей таңы
