7-8 желтоқсан күндері Абай облысының мәдениет, тілдерді дамыту және архив ісі басқармасының ұйымдастыруымен саз әлемінің саңлағы, қазақ музыкасы симфониялық күй жанрының негізін салушылардың бірі Еркеғали Рахмадиевтің 90 жылдығына арналған І Республикалық композиторлар байқауы өтті. Байқауға Алматы, Астана қалаларынан, Жамбыл, Қарағанды, Қызылорда, Ақтөбе, Абай облыстарынан келген 14 композитор өз шығармаларын ұсынды.
Дана ТАЛҒАТБЕК,
«Семей таңы»
Байқаудың мақсаты – өнерде орны бөлек дара тұлға Е.Рахмадиевтің өмірі мен шығармашылығын насихаттау, талантты композиторларды халыққа кеңінен танытып, оларға қолдау көрсету. Аягөз ауданының тумасы, КСРО халық әртісі, белгілі композитор, профессор, Еңбек Ері, мемлекет және қоғам қайраткері Еркеғали Рахмадиев – қазақ өнері үшін зор үлес қосқан XX ғасырдың басындағы ең жарқын тұлға. Ол қазақ халқының көрнекті композиторы бола отырып, музыка өнеріндегі тұтас бір дәуірдің тұлғасына айналды.
Байқау шарты бойынша, 50 жасқа дейінгі кәсіби және әуесқой композиторлар бұрын еш жерде жарияланбаған Абай облысының тарихы мен табиғатына басымдық бере отырып, туған жер, Отан тақырыптарына жазылған 1 шығарма ұсыну керек болды. 7 қазан күні Абай атындағы театрда байқаудың іріктеу кезеңі өтті. Байқауға ұсынылған туындыларға қазылар алқасы құрамындағы «Роза Бағланова атындағы «Қазақконцерт» мемлекеттік концерттік ұйымы» РМҚК директоры Ақтоты Райымқұлова, Е.Рахмадиевтің шәкірті, композитор Серік Еркімбеков, Еркеғали Рахмадиев атындағы қоғамдық қордың директоры, композитор Айсұлу Тани, Қазақстанның еңбек сіңірген қайраткері, композитор Жоламан Тұрсынбаев, Әміре Қашаубаев атындағы мемлекеттік филармонияның директоры, күйші, композитор Айбек Бекбосынов баға берді.
Ал 8 желтоқсан күні қазылар алқасы мүшелерінің қатысуымен баспасөз конференциясы өтті. Жергілікті БАҚ өкілдері Е.Рахмадиевтің шығармашылығы, еңбек жолы және байқау туралы сұрақтарын қойды.
— КСРО халық әртісі, белгілі композитор, профессор, Еңбек Ері Еркеғали Рахмадиевтің 90 жылдығына арналған республикалық композиторлар байқауы мәресіне жетті. Композитордың 90 жылдық мерейтойына орай республика көлемінде әр түрлі шаралар өткізілді. Жыл соңында сырлы саздың саңлағы, елінің еркесіне айналған композитор Еркеғали Рахмадиевтің есімі ұлықталған республикалық іс-шараларды қорытындылайтын байқаудың Абай жерінде өтіп жатқаны үшін облыс әкімдігі мен мәдениет басқармасына алғысымыз зор. Байқауға ұсынылған әр шығарма өзіндік сипатымен ерекше болды. Халық аспаптар оркестріне, этнографиялық-фольклорлық ансамбльдеріне арналған туындылар, эстрадалық әндер де болды. Алдағы уақытта да облыс әкімдігімен, мәдениет басқармасымен бірлесе отырып мәдениет, өнер саласында түрлі шаралар өткізу жоспарда бар, — деді Ақтоты Рахметоллақызы.
Баспасөз конференциясында «Роза Бағланова атындағы «Қазақконцерт» мемлекеттік концерттік ұйымы» РМҚК мен Абай облысының мәдениет, тілдерді дамыту және архив ісі басқармасы «Әміре Қашаубаев атындағы мемлекеттік филармониясы» КМҚК ұжымы мәдениет пен өнерді дамыту жөніндегі екі жақты меморандумға қол қойды.
Баспасөз конференциясынан кейін Абай атындағы театрда Еркеғали Рахмадиевтің 90 жылдығына арналған І Республикалық композиторлар байқауының жеңімпаздарын марапаттау салтанаты өтті. Байқауға қатысушыларды облыс әкімінің орынбасары Шалқар Байбеков құттықтады.
— Абай облысы дарынды тұлғаларды өмірге әкелген. Бұл байқаудың жас таланттарды тануда маңызы ерекше, сондықтан оларға қолдау көрсету мақсатында алдағы уақытта да дәстүрлі түрде өткізілетін ән байқауына айналатын болады, — дейді Шалқар Заманбекұлы.
Байқау қорытындысы бойынша, Жамбыл облысынан келген Ербосын Қасымбеков бас жүлдеге ие болды, жүлде қоры 500 мың теңге. І орын алматылық Төлебай Жарасханға бұйырды, жүлде қоры 300 мың теңге. Ал ІІ орын жерлесіміз Гүлдана Ноғайбаеваға берілді, жүлде қоры 200 мың теңге. ІІІ орынды да семейлік Слямқұл Береке иеленді, жүлде қоры 100 мың теңге.
Сондай-ақ басқа да қатысушыларға қазылар алқасының арнайы жүлделері табысталды. Еркеғали Рахмадиев атындағы қордың арнайы жүлдесіне семейлік Әділет Серіков, Роза Бағланова атындағы «Қазақконцерт» мемлекеттік концерттік ұйымының жүлдесіне ақтөбелік Жанболат Сағиев ие болды.
Республикалық байқау жеңіске жеткен композиторлардың қатысуымен өткен гала-концертпен қорытындыланды.
