КОММУНАЛДЫҚ ШАРУАШЫЛЫҚ
Өткен жұма 9 желтоқсан күні Семей қалалық мәслихат де- путаттары қаладағы «ЖЭО-1» және «№5 интернат» жылу қа- зандықтарына барып, ондағы жағдаймен танысты.
Семейде өткен екі апта бойы шыңылтыр аяз болып, ауа температурасы — 30 градустан көтерілген жоқ. Осы уақыттарда Энергетик, Қарағайлы сынды аудандарда бірнеше көп қабатты үйлерде жылу беру бәсеңдеп, тұрғындардың наразылығын тудырды. «№5 интернат» қазандығы қаладағы Энергетик шағын ауданындағы көп қабатты үйлерді жылумен қамтамасыз ету мақсатында ескі, аз қуатты қазандықтың орнына 2014 жылы салынған. Бұл қазандыққа Зағиптар қоғамы ауданындағы көп қабатты үйлер де қосылған. Тұрғындардың айтуынша, алғашқы жылдары пәтерлер ыстық болған. Бірақ бірнеше көп қабатты үйлердің салынуымен жылу жеткіліксіздігі байқалған. Жылу көзінің өзінде де істен шығу оқиғалары жиілеген. — Қазандық өз қуаттылығында жұмыс істеп тұр. Ауданда соңғы жылдары салынып жатқан құрылысқа байланысты үлкен жүктеме түсіп отыр және жылу барлығына жетпейді. Бейсенбі, 8 желтоқсан күні шлак пен күл шығару жүйесі, гидравликалық итергіш істен шықты. Жағдайды «Семей-Водоканал» мекемесінің суды үздіксіз тоқтатуы да қиындатып отыр. Дәл осы күні жылу желілерінде жөндеу жұмыстары 5 сағатқа созылды,- дейді «№5 интернат» жылу қазандығының басшысы Владимр Пучков. Соған қарамастан, аязды күндері суық алып қалған бөлмелер бірден жылынбады. Әлеуметтік нысандарға жүргізілген мониторинг №15 мектепте 9 желтоқсан күні таңертең ауа температурасы +19 градусты, жылытқыштар орнатылған «Ажар» балабақшасында +22 градусты көрсетті. Алайда 10 желтоқсанда таңға жуық «№5 интернат» жылу көзінде тазалау жүйесі істен шығып, температураның төмендеуіне алып келді. 36 көп қабатты тұрғын үйде жылу беру екі есеге азайды. Мұнда жөндеу жұмыстары жүргізіліп, жағдай қалпына келтірілді. Сонымен қатар «РК-1» жылу қазандығының ескіруіне байланысты Цементшілер кенті, Рысқұлов, Би Боранбай көшелеріндегі тұрғын үйлер мен нысандарда жылу жеткіліксіздігі анық байқалады. Бұл қазандықтарға жөндеу жұмыстары жүргізілмеген. Тұрғын үй — коммуналдық шаруашылығы бөлімінің мәліметінше, қазір жөндеу жұмыстарын жүргізудің жобасы әзірленген. Жуық арада бюджетке өтінім беріледі. Қалалық мәслихат депутаттары қаланың сол жағалауын жылумен қамтамасыз етіп отырған «ЖЭО-1-де» жылу желілерінің қалыпты жағдайда жұмыс істеп тұрғанына көз жеткізді. Айтылған мәселелер назарға алынып, кезекті отырыста қозғалатын болады.
Жадыра ТӨЛЕГЕНҚЫЗЫ,
«Семей таңы»
