Абай облысының әкімі Нұрлан Ұранхаев Семейдегі облыстық жұқпалы аурулар ауруханасының анестезиология және реанимация бөлімінің жұмысымен танысты.
Семей облыстық жұқпалы аурулар ауруханасының балалар бөлімі жөндеуден кейін қайта ашылды. Облыстық жұқпалы аурулар ауруханасының директоры Думанбек Дауылбеков жұқпалы ауру жұқтырған науқастарға жедел медициналық көмек көрсетудің халықаралық стандарттарына сәйкес KOMEK SSMP интеграциялық жүйесімен, Triage-zone принципімен таныстырды.
Айта кетейік, аурухана 2014 жылы Сауд Арабиясы Корольдігі мен облыс әкімдігі арасында қол қойылған меморандум аясында салынған.
Аурухана жалпы ауданы 8,5 мың шаршы метр болатын алты қабатты ғимаратта орналасқан. Ауласы абаттандырылып, қоршалған, ойын және спорт алаңы бар. 2022 жылы емхананың бірінші қабаты жөндеуден өтіп, далаға шығатын және кіретін есігі бар оқшауланған 3 палата жасалды.
Екінші қабатта үш палата ағымдағы жөндеуден өтіп, 6 төсектік реанимация бөліміне айналдырылды. Оттегі станциясы орнатылып, 25 пунктке орталықтандырылған оттегі берілді.
Емханадағы соңғы үлгідегі медициналық құрал-жабдықтар балаларды дер кезінде диагностикалауға және емдеуге мүмкіндік береді.
Бөлім 130 төсек-орынға есептелген. Ауа-тамшылы, ішек, вирустық, аса қауіпті және карантиндік инфекциялар жұқтырған науқастарды госпитализациялау үшін оқшауланған, жансақтау, диагностикалық палаталар, зертханалар бар. Жұқпалы аса қауіпті жұқпаларға күдікті науқастар оқшаулау бөлімшесіне жатқызылады.
Облысымызда балалардың жұқпалы аурулармен сырқаттануы жыл сайын өсіп келеді. Аталған бөлімде 2020 жылы 2659 бала, 2021 жылы 4836 бала, 2022 жылдың 11 айында 5751 бала емделген.
Жыл сайын 6-7 мыңға жуық науқас амбулаториялық негізде емделіп, қабылдау бөлмесінде консультативтік көмек алады.
Абай облысының әкімдігі
