Семей қаласында алғаш рет «Дін және мемлекет» тақырыбындағы облыстық семинар-кеңес өтуде. Семинарға аймағымыздағы қалалар мен аудандардың ішкі саясат бөлімі мамандары, дін мәселелерін зерттеу орталығының қызметкерлері мен теологтер қатысты.
Бүгінгі таңда қоғам үшін дін тақырыбы күрделі мәселелердің біріне айналып отыр. Қазақ халқы ғасырлар бойы ұстанып келе жатқан ислам діні адамгершілікті, бейбітшілікті насихаттайды. Ал имандылықты, ізгілікті халыққа жеткізуде теологиялық жұмыстардың алар орны ерекше. Қазіргідей ақпараттық шабуыл жағдайында халықтың діни сауаттылығын арттырудың маңызы зор.
Семинар-кеңесті Абай облысы Қоғамдық даму басқармасының басшысы Айдар Садырбаев ашты. Аталған іс-шараның маңыздылығы жайлы айтып өткен Айдар Серікқазыұлы жиынға қатысушы қонақтарды таныстырып, сөз кезегін берді.
Республикалық ақпараттық-насихаттық топтың белді мүшесі, заңгер, теология ғылымдарының докторы Азамат Нұғманұлы қатысушыларды Абай облысының құрылуымен құттықтап, дерадикализация және теологиялық жұмыстар бойынша біліктілікті арттыруда осындай іс-шаралар ұйымдастырудың маңыздылығын атап өтті.
Өз кезегінде ойын ортаға салған республикалық «Парасат» кеңес беру-әдістемелік орталығының директоры — жерлесіміз Индира Беркімбаева аталған іс-шараның дін мәселелері бойынша тәжірибе алмасу алаңына айналарына сенім білдіріп, семинар жұмысына сәттілік тіледі.
Семинар-кеңестің пленарлық мәжілісі аяқталған соң қатысушылар бірнеше аудиторияларға бөлініп, жұмыстарын бастап кетті.
Айта кетерлігі, жиын екі күнге созылмақ. Семинар-кеңесте аудандардан жиналған қатысушылар дін және мемлекет арақатынасы, зайырлылық принциптері, дәртүрлі емес деструктивті діни ағымдардан жастарды сақтандыру, діни радикализммен күрес, жат ағымдар жетегінде кеткен жандарды оңалту шаралары, теологиялық жұмыстар тақырыптарына қатысты бірқатар мәселелер бойынша өзара пікір алмасып, тәжірибелерін бөлісетін болады.
Азамат ЕРСАЙЫН,
«Семей таңы»
