Ата-бабамыздың арманы орындалып, жасампаздығымызды жаңа белеске көтерген еліміздің қасиетті де қастерлі тәуелсіздік мерекесі қарсаңында аудан тұрғындары қоныс тойын тойлады. Аудандық Қоғамдық кеңес пен ардагерлер кеңесінің мүшелері, ауыл тұрғындары қатысқан салтанатты жиында аудан әкімі Нұржан Әбдікәрімов әлеуметтік осал топтар санатындағы 22 отбасыға тұрғын үйлердің кілттерін табыстады. Қарауылдағы Абай саябағының жанынан бой көтерген бұл тұрғын бүгінде үйлер шағын ауданға айналды.
Дана ТАЛҒАТБЕК,
«Семей таңы»
Әлеуметтік әл-ауқат тұрғын үй мәселесімен тығыз байланысты. «Халықтың осал топтарын әлеуметтік тұрғыдан қолдау – мемлекеттің басты міндеті»,- деп Мемлекет басшысы Қ.Тоқаев айтып өткендей, көмекке мұқтаж отбасыларды қолдауға бағытталған кешенді іс-шаралар облыс көлемінде атқарылып келеді. Әсіресе баспанамен қамту — басты мәселе. Бұл ретте аймақ бойынша тұрғын үйлер көптеп салынып жатқаны белгілі. Мысалы, бір ғана Абай ауданында биылғы жылы 32 отбасы жаңа шаңыраққа ие болды.
— Құрметті жерлестер! Баршаңызды еліміздің маңызды мерекесі – Тәуелсіздік күнімен шын жүректен құттықтаймын! Тәуелсіздік – әр қазақтың кеудесіне таққан ең мықты ордені, ең биік мәртебесі. Ғасырлар тоғысында бабалардың қанымен, ыстық қайраты, ерік-жігерінің арқасында осындай бейбіт күннің қуанышына бөленіп отырғанымыз ақиқат. Еліміздің ең қастерлі мерекесі, елдігіміз бен егемендігіміздің айғағы болған Тәуелсіздік күні қарсаңында ауданымызда тағы бір қуаныш орын алып отыр. Баршаларыңыздың отбасыларыңызға амандық, еңбектеріңізге табыс, қажырлы еңбек, жарқын болашақ, мықты денсаулық тілеймін! Еліміздің іргесі мықты, болашағы жарқын, келешегі кемел, ұрпағы ұлағатты, дара жолы бар мықты мемлекетке айналған қалыбынан таймай, тәуелсіздік туы мәңгі желбіресін! Қазақстанның болашағын жасайтын ұрпағымыз аман болсын! Ауданымызда қуанышты жаңалықтар легі толастамай, еліміз аман, жұртымыз тыныш, тәуелсіздігіміз мәңгілік болсын! — деп аудан әкімі Нұржан Әбдікәрімов тұрғындарды мерекемен құттықтай келе, жаңа қоныс иелеріне баспан кілттерін табыс етті.
Еске сала кетейік, аудан бойынша соңғы үш жылда 96 отбасы баспанамен қамтамасыз етілді. Халықтың әл-ауқатын арттыруға бағытталған жұмыстар алдағы жылы өз жалғасын табады деген сенімдеміз.
