Абай облысының орталығы Семей қаласында жуырда ерлер мен әйелдер арасында спорттық және жауынгерлік самбодан Қазақстан Республикасының Кубогы — Қабанбай батыр мемориалы өтті. «Арена» мәдени-спорт кешенінде үш күнге жалғасқан жарыста еліміздің кіл мықты самбо саңлақтары бас қосып, ерлер 8 салмақта, әйелдер 7 салмақта бақ сынады.
Ертіс жағасына төселген бозкілемнің көрігін қыздыруға 400-ден аса балуан жиналғанын айта кету ләзім. Қабанбай батыр мемориалы биыл дәстүрлі түрде 22-ші мәрте ұйымдастырылып отырғанын да еске салып өткен орынды. Биылғы бәсі жоғары бәсеке Қабанбай батырдың 330 жылдығына арналған мәдени және спорттық іс-шаралардың қорытындысы деуге болады. Жарыстың ашылу салтанатында Абай облысы әкімінің бірінші орынбасары Айдын Кәрімов еліміздің самбошыларына Абай облысының әкімі Нұрлан Ұранхаевтың құттықтауын жеткізді. Халықаралық «Қабанбай» қоғамдық қорының төрағасы Құсман Шалабаев, Қазақстан Республикасы спорттық және жауынгерлік самбо федерациясының бас хатшысы Ерназар Бексұлтанов, самбо күресінен мемлекеттік жаттықтырушы Асылбек Кәкенов спортшыларға сәттілік тіледі. Соңғы жылдары елімізде самбо күресінің дамуы даңғыл жолға түскен. Әсіресе Семейде күрестің осы түрінен түрлі жарыстар тиянақты өтіп келеді. Соңғы үш жылда екі рет Қазақстан чемпионаты мен жастар арасында өткен ел біріншілігі сөзімізге дәлел бола алады. Сонымен қатар жарыстың ашылуында Қазақстандық жауынгерлік өнер ассоциациясының қолдауымен республикалық спорттық және жауынгерлік самбо федерациясы тарапынан Абай облысының самбошыларына жаңа күрес кілемі табыс етілді. Жалпы, мұндай күрес кілемі бұған дейін де 10 облысқа берілген болатын. Бүгінде Шымкент қаласы, Қарағанды, Павлодар, СҚО, Қостанай, Жамбыл және Жетісу облыстарының самбошылары жаңа кілемде жаттығу жасап жүр. Бұл ретте еліміздің самбошылары Қазақстандық жауынгерлік өнер ассоциациясына, «Самұрық-Қазына» АҚ, «Спорт қорына», «KAZ Minerals» компаниясына, республикалық спорттық және жауынгерлік самбо федерациясына алғыс айтамыз.
Бұл жарыста Абай облысының намысын спортшылар жақсы қорғады. Әйелдер арасында 50 келіде Альира Шегелекова күмістен, 54 келіде Дильназ Қырықбаева қоладан медаль тақты. 65 келіде Жанерке Жасұланқызы қолаға қол созса, осы салмақта Зарина Сарипова чемпион атанды. Ерлер арасында 53 келіде Сұңғат Нұрлатұлы қола жүлде алды. 64 келіде Төлеген Нұрғалиев пен +98 келіде Ерасыл Қажыбаев қарсыластарын қапы қалдырып, жеңіске жетті. 71 келіде Нұрғали Тұрсынғазиев, 88 келіде Елдар Бейсембаев, 98 келіде Руслан Жарқынбаев күміспен күптелді. Жауынгерлік самбодан да спортшылар жақсы нәтиже көрсетті. 58 келіде Мұхтар Мейрамбек, 71 келіде Дәурен Дәкенов жеңістің биік тұғырынан көрінді. Өз салмақтарында Айғасыр Әбілов, Ербота Нұртасов күміс жүлде алса, Жастілек Ахметбеков, Дәулет Аманұлы, Ернар Оразаев, Армат Жетпісов, Дамир Секен қолаға қол созды.
Ал үшінші күні командалық жарыста әйелдер арасында Түркістан облысына жол берген Абай облысының командасы екінші орынға жайғасты. Ал жауынгерлік және спорттық самбодан Абай облысының командасы қарсылас шақ келтірмей, бірінші орын алды.
Абай облысының спорттық және жауынгерлік самбо федерациясы
