Абай облысында соңғы тәулікте жолда қалған 65 адам эвакуацияланды, деп хабарлайды ҚазАқпарат тілшісі.
Облыс әкімдігінің мәліметіне сүйенсек, соңғы тәулікте апаттық-құтқару жұмыстары «Өскемен-Қалбатау», «Көкпекті-Биғаш», «Семей-Алматы», «Семей-Қарауыл», «Семей-Өскемен», «Семей-Қайнар», «Қалбатау-Көкпекті» тасжолдарының учаскелерінде жүргізілді.
«Іздестіру-құтқару жұмыстарына Абай облысы ТЖД жеке құрамынан 25 адам және 7 техника жұмылдырылған. Өңір бойынша барлығы жолда қалған 65 адам эвакуацияланды, оның ішінде 6 бала бар. Қар құрсауында қалған 20 көлік шығарылды», — делінген ақпаратта.
Автокөлік жолдарының ашылуы мен жабылуы туралы ақпаратты 8 (701) 532 95 58, 8 (701) 618 32 31( «Семей Жолдары» ЖШС, облыстық маңызы бар жолдарға қатысты) және 8 (7232) 26-28-08 («ҚазАвтоЖол ҰК»АҚ, республикалық маңызы бар жолдарға қатысты білуге болады. Қандай да бір қиын жағдайға тап болсаңыздар «112» нөміріне қоңырау шалу қажет.
