Жуырда Семей қаласында облыс бойынша «Табысты отбасы» әлеуметтік жобасының алғашқы қатысушыларына салтанатты түрде сертификаттар табысталды. Жоба аясында республиканың бес облысында бірінші лектің 114 қатысушысы оқуын сәтті аяқтады.
Жадыра ТӨЛЕГЕНҚЫЗЫ,
«Семей таңы»
Абай облысының 29 тұрғыны «Табысты отбасы» әлеуметтік жобасы аясында оқуын аяқтағаны туралы сертификат алды. Олар бір ай бойы кешенді оқу курсынан өтіп, кәсіби дағдыларды игерді. «Табысты отбасы» жобасына қатысушыларды «Самұрық-Қазына» АҚ портфельдік компанияларының өкілдері, қоғам белсенділері, бизнес-тренерлер мен жоба тәлімгерлері құттықтады.
Жобаға облысымыздан қатысқан 29 адамның 10-ы әлеуметтік желілердегі маркетинг бойынша білім алса, 13 тұрғын bеauty саласын таңдады және 6 қатысушы «Кондитерлік іс» мамандығы бойынша оқудан өтті.
Қатысушылар үшін жоба мұнымен аяқталған жоқ. Үш ай ішінде олар өз ісін бастау және дамыту мәселелерінде тәлімгерлерден әлі де қолдау алатын болады. Ең бастысы, оларға 150 АЕК сомасына қажетті құрал-жабдық тегін беріледі.
Бұл орайда «Табысты отбасы» жобасы «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қорының қаржылай қолдауының арқасында іске асырылып жатқанын атап өткен жөн. Аталған қор медициналық және әлеуметтік жобаларды қолдаумен айналысады. «Жаңа Қазақстан» тұжырымдамасы аясында қор өңірлерді және алыс ауылдарды дамытуға баса назар аударуда.
— Бүгін оқудан өтіп, өз ісін ашуға мүмкіндік алған отбасылар үшін маңызды күн. Біз Жаңа жыл қарсаңында жүздеген адамның тәлімгерлер мен жаттықтырушылардан тәжірибе жинап, кешенді оқытудан өткеніне және отбасының қаржылық жағдайын жақсарту үшін нақты қолдау алғанына қуаныштымыз. «Табысты отбасы» жобасының әрбір қатысушысының ісі алға бассын деп тілейміз,- деп құттықтады жоба түлектерін «Самұрық-Қазына» АҚ портфельдік компанияларының өкілі.
— Жобаның бірінші күнінде қатысушылардың әрқайсысында қорқыныш сезімі басым еді. Бірақ барлығына ортақ бір мақсат болды. Ол — өз ісін ашу. Бір айдың ішінде қатысушылар көп жұмыс атқарды. Тәлімгерлер олардың жеке әлеуетін ашуға, кәсіпкерлік қабілеттерін дамытуға көмектесті. Жоба дизайнерлері әр түлек үшін логотип әзірледі. Бір айдың ішінде олар бір отбасының мүшесіндей болып кетті. Осы жобаның әрбір қатысушысы өз мақсатына жетіп, қаржылық жағдайларын жақсартатындарына сенімдімін,- дейді жоба тәлімгері Лаура Байділданова.
Естеріңізге сала кетейік, «Табысты отбасы» әлеуметтік пилоттық жобасы 1 желтоқсанда Абай, Жетісу, Ұлытау, Түркістан және Ақтөбе облыстарында бастау алған болатын. Жоба халықтың неғұрлым осал топтарының өкілдерін, оның ішінде көп балалы және аз қамтылған, ерекше қажеттіліктері бар балаларды тәрбиелеп отырған, сондай-ақ асыраушысынан айырылған отбасыларды, табысы төмен жанұядан шыққан жастарды кешенді оқытуға бағытталған.
Оқыту бағдарламасы аясында қатысушылар тігін ісі, автоэлектрик, кондитерлік өнімдер, beauty саласы және әлеуметтік медиа менеджері сияқты бес бейіндік бағыттың бірін таңдайды. Жобаның басты ерекшелегі — қатысушалр бейіндік оқытудан өтіп, жаттықтырушы мен тәлімгердің барлық талаптарын орындаған жағдайда өз ісін ашу үшін қажетті жабдықты өтеусіз алады.
