199 БИЗНЕС-ЖОБАҒА ГРАНТ БӨЛІНДІ
2021-2025 жылдарға арналған кәсіпкерлікті дамыту жөніндегі ұлттық жоба шеңберінде Абай облысы бойынша өткен жылы, гранттарды қарау комиссиясының шешімімен, 199 жобаға жалпы сомасы 243 814 800,0 теңге грант берілді.
Жадыра ТӨЛЕГЕНҚЫЗЫ,
«Семей таңы»
Семей қаласы әкімдігінің Халықты жұмыспен қамту орталығының мәліметіне сүйенсек, ауылдық елді мекендерден 44 үміткерге 53 908 800,0 теңге, қала тұрғындарынан 155 үміткерге 189 906 000,0 теңге грант берілген. Грант алушылар ішінде 64 адам көп балалы отбасыдан болса, 11-і — мүгедектігі бар жандар, 8-і — АӘК алушылар, 15-і мүгедектігі бар балаларды тәрбиелеп отырғандар қатарынан, 4-уі — қоныс аударушылар, 1-уі қандастар қатарынан, 1 адам — асыраушысынан айырылған жағдайда төленетін әлеуметтік жәрдемақыны алушы, 95 адам жиырма тоғыз жасқа толмаған жастар қатарынан. Гранттар ауылдық елді мекендерде ірі қара, жылқы, қой малдарын өсіру үшін де берілген.
Қала тұрғындарына тігін ісін дамытуға 28 грант, шағын наубайхана ашуға 5, жартылай фабрикат өнімдерін өндіруге 21, кондитерлік өнімдер дайындау үшін 27, массаж саласына 8, сұлулық салонына 16, техникалық қызмет көрсету орталығы үшін 5, мебель цехын ашуға 5, асхана ісіне 1, жылыжай ашуға 2 грант берілсе, 37 грантты басқа да қызмет көрсету салалары бойынша ұтып алған.
Курчатов қаласында өткен жылы мемлекеттік грант алу конкурсына 61 адам қатысса, оның 36-сы бизнес-идеяларын сәтті қорғап, өз ісін ашуға 400 АЕК көлемінде грант алды.
Мемлекеттік бағдарлама – қоғамдық тамақтану, косметология, химиялық тазарту, наубайхана, лазерлік кесу және жиһаз жасау цехы, «кино бөлмесі», баспахана саласындағы жобаларды жүзеге асыруға мүмкіндік берді.
Грант алушылар қатарында 21 жас кәсіпкер, 8 көп балалы отбасы, 4 мүгедек және 3 әлеуметтік жәрдемақы алушы бар. Олар бизнес әлеуетін іске асырып, өндірісті жолға қоюға және сол арқылы өздерін тұрақты табыспен қамтамасыз етуге мүкіндік алды.
Жас кәсіпкер Айнұра Зиминова — қалада алғашқы кофехана ашқан грант иегерлерінің бірі.
— Менің бизнес-идеям жерлестерімнің жайлы ортада отбасымен, достарымен уақытты жақсы өткізулеріне мүмкіндік береді. Қазір адамдарға тыныш орта мен жақсы қарым-қатынас жетіспей жатады. Сол себепті өз достарым мен жақындарымның хош иісті кофе ішіп, уақыттарын қызықты өткізетін орын ашу туралы ойға келдім. Бұл орайда арманымды жүзеге асыруға мемлекеттік грант көмектесетінін түсіндім. Осындай мүмкіндіктер бергені үшін мемлекетке алғысымды білдіремін. Отандастарыма да жасалып отырған мүмкіндіктерді пайдаланып, өз жоспарларыңызды іске асырыңыздар дегім келеді,- дейді ол.
Мемлекеттік гранттар жаңа жұмыс орындарының ашылуына, қаланың әлеуметтік-экономикалық дамуына да оң әсер етеді.
