Өткен жылы Абай облысында 193 әйел ЭКО-ға жіберілсе, оның 67-сі осы әдіс арқылы жүкті болған. Қазір олар ана атануға үмітті. Ал өткен жылы аймағымызда «Аңсаған сәби» бағдарламасы бойынша ЭКО көмегімен 16 бала дүниеге келген. Бұл туралы Абай облысы бойынша міндетті әлеуметтік сақтандыру қорының баспасөз қызметі хабарлады.
Айтолқын САМАТОВА,
«Семей таңы»
Президент бастамасымен елімізде 2021 жылдың басынан бері «Аңсаған сәби» әлеуметтік бағдарламасы іске қосылғаны белгілі. Осы бағдарлама көмегімен Қазақстанда көптеген жұп ата-ана атанды.
«Өткен жылы облысымызда экстракорпоралды ұрықтандырудың 200-ге жуық циклі жасалды. Егер қарсы көрсетілімдер болмаса, әйелдер көмекші репродуктивті технологияны енгізетін емхананы өз бетінше таңдай алады. Биыл бұл қызметтерді республика бойынша 19 медициналық ұйым көрсетіп отыр», — деді облыстың бас гинекологі Архат Дайрабаев.
Оның айтуынша, алдымен науқас МӘМС аясында көмекші репродуктивті технологиялар бойынша қызмет көрсететін медициналық ұйымды өз бетінше таңдайды. Осыдан кейін ол жоғары технологиялық медициналық қызмет көрсету комиссиясының қорытындысын алу үшін тіркелген жері бойынша учаскелік дәрігеріне жүгінуі керек. Учаскелік дәрігер науқасты бедеуліктен зардап шегетін диспансерлік науқастардың электронды тізіліміне (ЭДБ) енгізеді. 12 ай ішінде тиісті тексеруден өтіп, бедеуліктің себептерін анықтағаннан кейін, мамандандырылған маманның қорытындысы негізінде учаскелік дәрігер науқастың құжаттарын міндетті медициналық сақтандыру есебінен жоғары технологиялық медициналық қызмет көрсету комиссиясына жібереді. Оң шешім қабылданса, құжаттардың толық пакеті емдеуге жатқызу бюросының порталына жіберіледі. Пациентке қызмет көрсетудің басталатын күні мен уақыты хабарланады.
Бағдарлама аясында қандай да бір сұрақтар туындап жатса, пациенттерге қолдау көрсету орталығына хабарласуға болады. Сонымен қатар мәндетті әлеуметтік медициналық сақтандыру қорының fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot арқылы хабарлама жіберуге болады.
