SAMRUK-KAZYNA TRUST-тің ТАРТУЫ
Сәрсенбі, 11 қаңтар күні «Самұрық-Қазына» АҚ компаниялар тобының қайырымдылық қызметіне арналған қорытынды кеш өтті. Салтанатты шараға Абай облысы әкімінің орынбасары Шалқар Байбеков қатысты.
Дана ТАЛҒАТБЕК,
«Семей таңы»
Samruk-Kazyna Trust әлеуметтік жобаларды дамыту қоры 2016 жылдан бері «Самұрық-Қазына» АҚ компаниялар тобының атынан бірыңғай қайырымдылық қызметімен айналысады. Қор денсаулық сақтау, білім беру, мәдениет, бұқаралық спорт, халықтың әлеуметтік топтарын қолдау салаларында тұрақты түрде өз жобаларын жүзеге асырып келеді. Басты мақсаты Қазақстан Республикасы азаматтарының әлеуметтік-экономикалық өмірін жақсартуға көмектесу болып отыр.
Салтанатты шара Samruk-Kazyna Trust әлеуметтік жобаларды дамыту қорының 2022 жылы атқарған қайырымдылық жұмыстарының қорытындысын шығаруға арналды. Қорытынды кеште «Самұрық-Қазына» АҚ-ның қоғаммен байланыс және өзгерістерді басқару жөніндегі басқарушы директоры Ғибрат Ауғанов Абай облысы әкімінің орынбасары Шалқар Байбековке Samruk-Kazyna Trust әлеуметтік жобаларды дамыту қоры тарапынан облысымыз үшін арнайы медициналық көліктер — 5 реанимобиль мен 3 инватакси сертификатын табыстады. Жаңа көліктердің медициналық қызмет көрсету сапасын жақсартуға септігін тигізетіні анық.
Аталған шара барысында сонымен қатар маңызды әлеуметтік жобалардың жүзеге асырылуы туралы есеп беріліп, қатысушылар емін-еркін пікір алмасты.
Осы ретте айта кетер тағы бір қуанышты жаңалық бар. Абай облысының дәрігерлері енді ұшақпен де жедел көмек көрсете алады. Абай облысы жедел медициналық жәрдем станциясының медициналық авиация бөлімшесінде елеулі оқиға орын алды десек те болады. Алдағы уақытта медициналық авиация желісі бойынша ұша алатын L 410 ұшағы Павлодар, Өскемен, Аягөз қалалары мен Үржар ауылынан бір мезгілде бірнеше науқасты жоғары мамандандырылған медициналық көмек көрсету үшін Абай облысының медициналық орталықтарына тасымалдайтын болады.
Жуырда Абай облысының дәрігерлері осы әуе кемесімен Үржар ауылына алғаш рет ұшып барды. Акушер-гинеколог дәрігер А.К.Дайрбеков, реаниматолог дәрігер Д.С.Төкенов әлеуметтік желіде медициналық авиация жайында пікір білдірді.
«Абай облысының медициналық авиация қызметінің L 410 ұшағымен жабдықталуы облыстың денсаулық сақтау саласын дамытудың жаңа кезеңін ашады. Біз бұған өте қуаныштымыз, өңіріміздің тұрғындарына медициналық көмек көрсету сапасын одан әрі жетілдіретін боламыз», — деп атап өтті сала мамандары әлеуметтік желідегі @skoraya103semey атты жеке парақшасында.
Абай облыстық жедел медициналық жәрдем станциясының медициналық авиация бөлімшесі мамандары әуе кемесімен қамтамасыз етуге жәрдемдескені үшін Қазақстан Республикасы Денсаулық сақтау министрлігінің шұғыл медицинаның ұлттық үйлестіру орталығына алғыстарын білдіруде.
