Жуырда Алматы қаласындағы Ұлттық кітапханада мемлекет және қоғам қайраткері, мәдениеттанушы, Қазақстан Жазушылар одағының мүшесі, Қазақстанның еңбек сіңірген қайраткері Мұрат Мұхтарұлы Әуезовтің 80 жылдық мерейтойына арналған «Өткірдің жүзі» атты кездесу кеші өтті. Аталған шараға Абай ауданынан Кәмен Оразалин мұражайының меңгерушісі Елдар Оразалин арнайы қатысып, Абай облысының әкімі Нұрлан Тельманұлы мен Абай ауданының әкімі Нұржан Оразбекұлының құттықтауларын жеткізді.
Дана ТАЛҒАТБЕК,
«Семей таңы»
Мұрат Әуезов – көрнекті қоғам қайраткері, мәдениеттанушы-ғалым, жазушы, қазақ халқына қызмет етуді өмірлік парызы көрген бүгінгі заманның белгілі тұлғасы. Аталған іс-шараның мақсаты – жазушының өмірі мен шығармашылығын үлгі ете отырып, ұрпақтар сабақтастығын сақтау, жастар арасында рухани-мәдени және жалпыадамзаттық құндылықтарды насихаттау.
Кеш барысында жазушыны арнайы құттықтай келген өкілдер Мұрат Мұхтарұлына ізгі тілектерін білдіріп, шапан кигізді. Абай ауданындағы Кәмен Оразалин музей-үйінің меңгерушісі Елдар Оразалин Абай облысы жұртшылығының атынан Мұрат Әуезовті мерейтоймен құттықтап, ақ жарма тілегін білдірді.
«Асыға жетелеген уақытта,
Абыройға кенелу – құт, бақыт та.
Ау, Ағажан, ұлы адамның ұрпағын –
Ел теңеген, тектілікке – жақұтқа!
Мұхтарұлы Әуезовсыз – Мұратсыз,
Бізге аға, рухы күшті – қуатсыз!
Тура жолдан айнымаған – ұждансыз,
Әлде кімге ашылмаған сұрақсыз?!
Қазақ үшін соғып тұрған жүрексіз,
Парасатқа сүйеу болған тірексіз.
Ұлылықтың жаршысысыз – тілексіз!
Мерейтойда сөз айтайын бек тұрып,
Абай туған сонау елден кеп тұрып.
Мұрат аға, 80 жасың құт шашып,
Салтанат боп жасай берсін тектілік!» — дей келе, аудан әкімінің аудандық мәслихатпен бірлесе шығарған шешімімен Мұрат Әуезовке берілген «Абай ауданының құрметті азаматы» төсбелгісін салтанатты түрде табыстады. Елдар Оразалин өз сөзінде Мұхтар Әуезовтің соңғы хаты ұлы тұлғамен үзеңгілес болу, шексіз ұлағатын көру бақыты бұйырған «Дана Мұхтардың дара шәкірті» атанған әкесі Кәмен Оразалинге арналғанын айта отырып, кешке жиналғандар алдында хатты оқып берді.
Кездесу аясында ҚР Ұлттық кітапханасының қорынан Мұрат Әуезовтің қызметі мен шығармашылығына арналған «Өткірдің жүзі» атты кітап көрмесі ұйымдастырылды. Көрмеде Әуезов әулетіне қатысты 1962 жылдан бастап жиналған 2 мыңға жуық туынды халық назарына ұсынылды.
