АЗЫҚ-ТҮЛІК ҚАУІПСІЗДІГІ – ӨЗЕКТІ МӘСЕЛЕ
Абай облысының өңірлік коммуникациялар қызметінде облыстық ветеринария басқармасының басшысы Ержан Барышевтың қатысуымен баспасөз конференциясы өтті.
Әлібек КЕМЕЛХАН,
«Семей таңы»
Жиын барысында басқарма басшысы облыс көлемінде ветеринария саласында атқарылып жатқан жұмыстармен таныстырып, алдағы жоспарлармен бөлісті.
Ержан Барышевтың айтуынша, Абай облысында азық-түлік қауіпсіздігін қамтамасыз ету мақсатында 138 мал сою нысаны, 4 ет өңдеу кәсіпорны, 11 сою пункті, 123 сою алаңы жұмыс істеп тұр. 2022 жылы сою нысандарында сою алдындағы және союдан кейінгі тексеруден өткен 54 133 бас ІҚМ, 32 599 бас ұсақ мал, 12 185 бас жылқы, 1042 бас шошқа сойылған.
Облыс аумағында санитарлық тазалау және мал өлекселерін жою мақсатында 152 мал қорымы жұмыс істеді, оның ішінде 65 типтік және 87 қарапайым мал қорымы бар.
— Өткен жылы Семей қаласында типтік жаңа қалалық мал қорымы салынды, ал биыл бес мал қорымын салу жоспарланып отыр, — дедi Ержан Барышев.
Бұған дейін айтылғандай, алдағы уақыттарда Абай облысында қаңғыбас иттер мен мысықтарды ұстайтын орталық салынатын болады. Бұл жайында облыс әкімі Нұрлан Ұранхаев мәлімдеген болатын. Қазір құрылыс алаңының мәселесі шешілуде.
– Қаңғыбас жануарларды енді ғана аулай бастасақ та, қазірдің өзінде 35 ит ұсталды. «4 лапы» қоғамдық қорымен келісімшарт жасадық. Облыс әкімі Нұрлан Ұранхаевтың тапсырмасы бойынша нысанның орналасатын жерін қала әкімдігі анықтайды. Орын анықталғаннан кейін қаржыландыру мәселесі шешілетін болады, – деді Ержан Барышев.
Сонымен қатар қалалықтар, көше кезген қараусыз жануарларды байқаған жағдайда, 63-34-43 нөміріне хабарласа алады. Аулау қызметі сағат 9:00-ден 18:30-ға дейін жұмыс істейді және азаматтардың өтініштерін қабылдайды,- деді басқарма басшысы.
Ержан Барышев басқарманың аса қауіпті ауруларға қарсы ветеринариялық-профилактикалық және диагностикалық іс-шараларды бекітілген жылдық жоспар мен нұсқаулықтарға сәйкес толық көлемде орындағанын атап өтті.
Өткен жылы бекітілген жылдық диагностика жоспарына сәйкес, бруцеллезге қарсы 811 600 бас ірі қара мал, 1 102 300 бас ұсақ мал, 180 бас жылқы тексеруден өткізіліпті. Оның ішінде 4556 бас ірі қара, 676 бас ұсақ мал бруцеллез ауруына оң нәтиже берген. Бруцеллез ауруына оң нәтиже берген барлық ауыл шаруашылық жануарлар уақтылы санитарлық союға жіберілген.
— Жоспарлы диагностикалық зерттеулердің нәтижелеріне сәйкес, облыс аумағында 2022 жылы аса қауіпті аурулардың 48 ошағы тіркелді. Оның ішінде 30 бруцеллез, 8 құтыру, 4 эмфизематозды карбункул, 2 пастереллез, 2 ринотрахеит және вирустық диарея, листериоз және 1 ошақ қатерлі ісік анықталды. Бүгінгі таңда 44 ошақ сауықтырылды. Қалған 4 ошақта (бруцеллез бойынша Үржар ауданында — 3 ошақ, Жарма ауданында — 1 ошақ) республикалық індетке қарсы отряд күшімен сауықтыру іс-шаралары жалғасуда,- деп атап өтті Абай облысының ветеринария басқармасының басшысы Ержан Барышев.
Баспасөз мәслихаты барысында Ержан Барышев өңіріміздегі мал басын таңбалау, карантиндік шектеулерді алып тастау және өзге де мәселелер туралы сөз қозғап, БАҚ өкілдері қойған сауалдарға жауап берді.
