Өткен аптада Абай атындағы кітапханада жазушы, драматург, қоғам қайраткері, ҚР Мемлекеттік сыйлығының лауреаты Төлен Әбдіктің шығармашылығына арналған кітап көрмесі ұйымдастырылды. Көрменің ашылуына кітапхана оқырмандары, студенттер қатысты.
Дана ТАЛҒАТБЕК,
«Семей таңы»
«Бір ел – бір кітап» республикалық акциясы елімізде 2007 жылдан бастап іске асырылып келеді. Акцияның негізгі мақсаты – ұлттық әдебиетіміздегі ең үздік туындыларды насихаттау, жастарға рухани-адамгершілік және патриоттық тәрбие беру. 2023 жылы аталған республикалық акция аясында қазақ жазушысы, драматург, қазақ прозасында ерекше қолтаңбасы бар қаламгер Төлен Әбдіктің шығармаларын оқу ұсынылды.
Қаламынан таным тамшылары мөлдіреген жазушының «Көкжиек», «Күзгі жапырақ», «Ақиқат», «Айтылмаған ақиқат» сынды әңгіме, повесть жинақтары, «Өліара», «Ақшоқыда қыс қатты», «Парасат майданы» романдары жарық көрді. Сонымен қатар қаламгер «Эллада ерлері» атты грек аңыздарын қазақ тіліне аударған.
Кітапхана қызметкерлері көрмеге қатысушыларға жазушының өмірі мен шығармашылығы жайлы әңгімелеп, қаламгер туралы жазылған естеліктермен таныстырды. Абай атындағы кітапхананың оқырмандарға қызмет көрсету бөлімінің кітапханашысы Айжан Бәзелханова қаламгердің қызы Қарлығаш Әбдікованың естелігінен үзінді оқып берді. «Маған әкемнің барлық шығармасы ұнайды. Ішінде ерекше ұнайтыны – «Әке» және «Өліара». Себебі «Әке» өзіміздің өмірбаянымызға байланысты жазылған. Өте жақсы көретін Әбдік атам – шығарма прототипі», — деп жазады Қарлығаш Әбдікова.
- Төлен Әбдіктің үлкенді-кішілі отызға жуық еңбегі бар. Жазушының шығармалары тұлғасы бөлек кейіпкерлермен ерекше. Себебі автор әр кейіпкерінің мінезін зерттеп, өлшеп жазады. Ал оның образдары қиялдан туған кейіпкерлер емес, сіз бен біздің жанымыздағы адамдар. Қарапайым тілде жазылғандықтан, әңгімелерін оқу оңай, тілге жеңіл, бірақ философиялық мағынасы құнды. Сондай туындылардың бірі – «Тозақ оттары жымыңдайды» повесі. Бір қарағанда, шығарма автордың қиялынан туған араку тайпасы туралы деп ойлауға болады, алайда бұл — кешегі бодандық бұғауда өлместің күнін кешкен қазақтың тағдырына алаңдаудан туған толғаныс, — дейді Айжан Бәзельханова.
Төлен Әбдіктің қаламынан туған шығармалары мен мақалалары жинақталған көрме кітапхана оқырмандары үшін бір апта бойы тұрмақ. Абай кітапханасы қала тұрғындары мен қонақтарын «Бір ел – бір кітап» акциясын қолдай отыра, қаламгердің шығармаларымен жақын танысуға шақырады.
