Биылғы жылы облыста 450 мың шаршы метр тұрғын үй құрылысы басталады
26 қаңтар күні Абай өңірлік коммуникациялар қызметінде Абай облысының Құрылыс, сәулет және қала құрылысы басқарма басшысы Айдын Бегімбековтің қатысуымен баспасөз конференциясы өтті.
Айдын Бегімбеков атап өткендей, Абай облысында өткен жылы нақты орындалған құрылыс жұмыстарының көлемі 186,9 млр. теңгені құрады. Бұл өткен жылмен салыстырғанда 112,5%-ға артық. Тұрғын үйді пайдалануға беру бойынша облысымызда 340 мың. шаршы метр тұрғын үй құрылысы аяқталды. 2021 жылға қарағанда өсу қарқыны 104,1 %-ды құрайды.
— Күні кеше ғана облысымызда Мемлекет басшысы Қасым-Жомарт Кемелұлының тапсырмасымен 150 орынға арналған тамаша сәулеттік келбетке ие оңалту орталығы ашылды. Барлықтарыңызға мәлім облысымыздың құрамына 2 қала және 8 аудан бар. Ағымдағы жылы басқармада 10 бюджеттік даму бағдарламасы және 4 ағымдағы бағдарлама бойынша инвестициялық жобалар қолға алынды. Атап айтсақ «Қуатты өңірлер – ел дамуының драйвері», «Ауыл-Ел бесігі», «Ауылдық денсаулық сақтауды жаңғырту», «Жайлы мектеп» сынды ұлттық жобалар жүзеге асады. «Ауылдық денсаулық сақтауды жаңғырту» ұлттық жобасы аясында үлкен жұмыстар басталды. Облыс бойынша 65 алғашқы медициналық-санитарлық көмек көрсету нысандары ашылатын болады. Оның ішінде 15 нысан – дәрігерлік амбулатория, 10 нысан ФАП, 40 нысан медициналық пунк. 57 нысанның құрылысы 2023 жылы басталады. Екі жыл ішінде аталған жоба аясында барлық нысандардың құрылысын аяқтау көзделген,- деді А.Бегімбеков.
«Жайлы мектеп» жобасы аясында облысымызда 11 мектеп ашылады. Оның 5-еуінің құрылысы биылғы жылы басталмақ.
— Бес мектептің екеуі Семей қаласында – Қарағайлы ықшам ауданында (1800 орын) және Водный кентінде (600 орын) бой көтереді. Сондай-ақ Аягөз қаласында (600 орын), Ақсуат пен Бесқарағай аудандарында (300 орын) білім беру орындарының құрылысы басталады. «Жайлы мектеп» жобасы аясында 2024 жылы тағы 6 мектептің құрылысы жалғасады. 11 мектептің құрылысын екі жыл ішінде аяқтап, 2024 жылдың жаңа оқу жылында пайдалануға беру жоспарлануда. Құрылыс жұмыстарын уақтылы аяқтаған жағдайда 5700 оқушы заманға сай жабдықталған мектепте білім алатын болады. Өздеріңіз білесіздер облыс әкімі Нұрлан Ұранхаев пен KazMinerals компаниясының ортақ келісімшарты негізінде тағы 1200 орындық жаңа мектеп салынады. Одан бөлек бірнеше мектептің жанынан 600 оқушыға арналған қосалқы ғимараттар салынады. Сол арқылы облысымыздағы орын тапшылығын жойып, толық қамтамасыз етуді жоспарлап отырмыз, — деді А.Бегімбеков.
Семей қаласында өткен жылы басталған 18 несиелі тұрғын үй құрылысы бүгінде жалғасуда. Осы жылы облысымызда тағы 22 несиелі көпқабатты тұрғын үйдің құрылысы жоспарланып отыр. Оның ішінде 19 тұрғын үй Семей қаласында, 1 тұрғын үй Курчатов қаласында, 2 тұрғын үй Аягөз қаласында бой көтеретін болады. Барлық салынатын әлеуметтік нысандар мен тұрғын үйлер инженерлік желілермен қамтамасыз етіледі.
— Биыл Ақсуат ауданында дене-шынықтыру кешені ашылды. Бородулиха мен Қайнар ауылдарында дене шынықтыру-сауықтыру кешендерінің құрылысы аяқталуға жақын. Үржар ауданында Өлкетану мұражайының филиалына және Ақсуат ауданындағы Көкжыра ауылдық клубына 2 жобалық-сметалық құжаттамаларды әзірлеуге жергілікті бюджеттен қаржы бөлінді. «Ауыл-Ел бесігі» ұлттық жобасымен Семей қаласындағы Приречное ауылының мәдениет үйінің қайта құру жұмыстары жалғасын табуда. Биылғы жылы қолданысқа беріледі. Азаматтық қорғаныс нысандары бойынша Үржар ауданындағы Алакөл көлінің жағасындағы жерді су бұру каналдарын салу арқылы құрғату жұмыстары жалғасады. Өрт сөндіру бекетінің нысандары 5 жобалық-сметалық құжаттамалар дайындалады. Осы жылы Үржар ауданының Мақаншы, Қабанбай, Үрджар, Таскескен, Бахты ауылдарында мал қорымдары құрылысына бастау алады. 2023 жыл бойынша барлық қаржыландыру есебінен облыста 450,270 мың шаршы метр тұрғын үй құрылысы жүргізіледі.
— деді Айдын Бегімбеков.
Баспасөз конференциясы барысында Абай облысының құрылыс, сәулет және қала құрылысы басқармасының басшысы Айдын Бегімбеков заңсыз құрылыстарға қатысты жүргізіп жатқан жұмыстар туралы айтып берді.
— Абай облысы құрылғаннан бері республиканың мәдени мұрасы ретінде көптеген тарихи нысандарды тізімге қостық. Семейде көптеген жеке сектордағы үйлерлі, музейлерді тарихи нысан ретінде қарастыруға болады. Семей қаласындағы заңсыз құрылыстарға келетін болсақ, Абай облысының бақылау басқармасы мен архитектура және құрылыс басқармасы Семей қаласы әкімдігімен бірлесіп, салынып жатқан құрылыс нысандарының құжаттарын заңдастыру бойынша үлкен жұмыстар атқарды. Қазір Семей қаласының жаңа Бас жоспары әзірленіп жатыр. Себебі бұған дейін қаланың Бас жоспары 2011 жылы дайындалған болатын. Құрылыс нысандары Семей қаласының Бас жоспарына немесе егжей-тегжейлі жоспарлау жобасына сәйкес келмесе, құжаттар қайтадан ретке келтіріледі. Біз қазір барлық ақпараттарды жинадық. Бұл бағытта жұмыстар жүргізілуде. Ал қаладағы ұйымдастырылмаған сауда-саттық орындары бойынша Семей қаласы әкімдігі тарапынантиісті жұмыстар қолға алынуда,- деді Абай облысының құрылыс, сәулет және қала құрылысы басқармасының басшысы Айдын Бегімбеков.
Басқарма басшысы Семей қаласының Бас жоспарына сәйкес, Бейбітшілік аралындағы туризмді дамыту мақсатында тағы бір көпір салу жоспарда бар екенін айтты.
— Бейбітшілік аралын қаламен жалғайтын тағы бір көпір салу жоспарда бар. Тек қаржыландыру мәселесі шешілуі керек. Бұған дейін Бейбітшілік аралын дамыту мақсатында бірнеше инвестициялық жобалар талқыланды. Бұл сұрақ қарастырылып жатыр,- деді Айдын Бегімбеков.
Семей қаласында оң жағалаудағы жылу жеткіліксіздігіне байланысты жаңа құрылыс нысандарын салу тоқтатылған.
— Оң жағалаудағы жылу жеткіліксіздігі мәселесі барлығымызға жақсы таныс. Бұған дейін рұқсат қағаздарын алып, құрылысын бастаған нысандарды жылумен қамту мәселесі қарастырылуда. Бұл бағытта Энергетика және тұрғын үй-коммуналдық шаруашылығы басқармасы жұмыстар жүргізуде. Қаладағы жылу желілерін жаңғырту бойынша жобалар Абай облысын Кешенді дамыту жоспарына енді. Соған сәйкес, оң жағалаудағы барлық нысандарды жеткілікті жылу мөлшерімен қамту жоспарлануда. Жаңа құрылыстарға уақытша тиым салынды,- деді Айдын Бегімбеков.
Басқарма басшысы сол жағалауда мешіт жанынан 400 орынға арналған Оқушылар сарайы салынатынын айтты. Қазір жоба мемлекеттік сараптамадан өтуде. Құрылыс жұмыстары 2025 жылға қарай аяқталады деп көзделуде.
— Сонымен қатар сол жағалауда мұз қалашынын салу көзделіп отыр. Алдын ала жер учаскесі анықталды. Қазір мердігерімен келіссөздер жүргізілуде. Қажетті құжаттарды алғаннан кейін, нақты қандай нысан салынатыны анықталады. Жоғарыда айтып кеткенімдей, Абай облысын дамытудың кешенді жоспары Үкіметте бекітілді. Мұнда көптеген маңызды құрылыстар қамтылған. Нысандардың тізіміне сәйкес, біздің басқарма тарапынан жоспарлы жұмыстар қолға алынды. Жер телімдері анықталған соң, жобалық-сметалық құжаттарды әзірлеуді бастаймыз. Өздеріңіз білетіндей, қазір қалада қандай да бір нысан салу үшін бос жер учаскелері жоқтың қасы. Көбіне бос жер телімдері қаланың шет жағында орналасқан. Ал біз орталықта болғанын қалаймыз,- деді Айдын Бегімбеков.
