27 қаңтар күні Абай облысының аймақтық коммуникациялар қызметінде Мемлекеттік қызмет істері агенттігінің Абай облысы бойынша департаменті басшысы, Әдеп жөніндегі кеңес төрағасы Әділбек Мұқашевтың қатысуымен баспасөз мәслихаты өтті.
Кербез ДУЛАТҚЫЗЫ,
«Семей таңы»
Департамент басшысы Мемлекеттік қызмет істері агенттігінің Абай облысы бойынша департаментінің өткен жылғы қызметінің қорытындысы және 2023 жылға арналған жоспары туралы баяндап, БАҚ өкілдерінің сұрақтарына жауап берді.
Әділбек Қайырбекұлының айтуынша, өткен жылы мемлекеттік қызметке қабылдау, ауыстыру тәртібімен тағайындау рәсімдерінің, қызметтік әдеп нормаларының бұзылғаны анықталып, Әдеп жөніндегі кеңестің екі отырысы өткізілген. Мемлекеттік қызмет көрсету сапасын бақылау кезінде мерзімін негізсіз бұзғаны үшін екі әкімшілік іс қозғалған. 96 мемлекеттік органдағы 1443 қызметшіге Әдеп кодексінің талаптары түсіндірілген.
Баспасөз мәслихатында департамент басшысы мемлекеттік қызмет істері бойынша 2023 жылға белгіленген міндеттерге тоқталды.
— Агенттікпен келісім бойынша байқау өткізбей басшы лауазымдарға тағайындау, сондай-ақ мемлекеттік тапсырыс шеңберінде жоғары оқу орындарын және жоғары оқу орнынан кейінгі білім беру бағдарламалары бойынша оқуды бітірген адамдарды басшы емес лауазымдарға конкурстан тыс тағайындау мүмкіндігі қарастырылған. Сонымен қатар «Жас мемлекеттік қызметшілер мектебі» жобасы аясында «Мемлекеттік секторға таланттарды іздеу және тарту» және өңірлік «Кадрлық резервтерді қалыптастыру» жобалары іске асырылып, осы жылы Президенттік жастар кадрлық резервіне кезекті іріктеу өткізілетін болады,- деді департамент басшысы.
Әділбек Мұқашевтің айтуынша, биыл мемлекеттік қызметке тестілеудің 24/7 қолжетімділігінің пилоттық жобасы жоспарланып отыр. Сондай-ақ үміткерлерге алдын ала белгіленген уақытта өтетін әңгімелесуден басқа барлық кезеңдерде кез келген уақытта және әлемнің кез келген нүктесінен қатысуға мүмкіндік беретін конкурстық рәсімнің жаңа форматы енгізіледі.
