Өткен аптада AMANAT партиясының Абай облыстық филиалында «Жастар рухы» жастар қанатының облыстық филиалының кезектен тыс ІІ конференциясы өтті. Конференция жұмысына AMANAT партиясының «Жастар рухы» ЖҚ төрағасы Нұржан Жетпісбаев, ЖҚ Абай облыстық филиалының атқарушы хатшысының міндетін атқарушы Майра Құржықаева, облыстық қоғамдық даму басқармасының басшысы, қалалық және аудандық Жастар ресурстық орталықтары басшылары мен жастар ұйымдарының өкілдері қатысты.
Дана ТАЛҒАТБЕК,
«Семей таңы»
Онлайн байланыс арқылы қосылған «Жастар рухы» жастар қанатының төрағасы Нұржан Жетпісбаев конференция жұмысына сәттілік тіледі.
— «Жастар рухы» жастар қанаты — облысымызда жастар саясатын жүзеге асыруға септігін тигізетін бірден-бір ұйым. Абай өңірінің жалынды жастары әрқашан жаңа бастамаларымен танылып келеді. Жаңа көзқарастағы азаматтар толқынын тәрбиелеу еліміздің дамуы үшін аса маңызды. Республика көлемінде болып жатқан шаралардан Абай облысы еш уақытта тысқары қалған емес. Бұдан былай да алдымызға қойып отырған жоспарлар ойдағыдай атқарылады деген сенімдемін, — деді Нұржан Арғынұлы.
Конференция барысында екі мәселе қаралды. «Жастар рухы» жастар қанаты облыстық филиалының өткен жылы атқарған жұмыстары және алдағы міндеттері туралы қалалық филиалдың жетекшісі Темірлан Бақтияров баяндады.
Темірлан Бақтияровтың айтуынша, Абай облысында «Жастар рухы» ЖҚ филиалы ашылғаннан кейін өңірдегі 2 қала мен 8 ауданда бастауыш бөлімшелер өз қызметін бастаған. Қазір Семей қаласында 12 бастауыш бөлімше жұмыс істеуде.
— Облысымызда филиал ашылғаннан бері бірқатар жастардың мәселелерін шешуге бағытталған қоғамдық іс-шаралар ұйымдастырылды. Мысалы, «Рухтастар cases» және «Bir tolqynda» диалогтік алаңында түрлі тақырыпта әр саланың үздік спикерлерінің қатысуымен жастармен кездесулер өтті. Ахмет Байтұрсыновтың 150 жылдығына және Мұхтар Әуезовтің 125 жылдығына орай, «Quiz» интеллектуалды ойындары өтті. Спортшы жастарымыз да назардан тыс қалған емес. Баскетбол жарыстары мен тоғызқұмалақ ойындарынан облыстық турнирлер ұйымдастырылды. Дәстүрлі «Арман ағашы» акциясы аясында ерекше қажеттілігі бар және мүмкіндігі шектеулі балаларға өздері қалаған сыйлықтарын табыс еттік. Жаңа жыл мерекесі қарсаңында өңірлік фтизиопульманология және оңалту орталығының бүлдіршіндері мен аз қамтылған отбасылардан шыққан балаларға сыйлықтар табысталды, — деді Темірлан Мақсатұлы.
Облыстық жастар қанаты филиалы мемлекеттік тілдің мәртебесін көтеруге де үлестерін қосуда. «Менің елім – менің тілім» жобасы аясында «Сөйле» оқыту клубы іске қосылып, 50-ге жуық азамат қазақ тілін меңгеруге ниет танытқан.
— Біз үшін жастарға қатысты барлық саламен жұмыс жүргізу аса маңызды. «Жастарға кеңес» жобасы бастау алып, жұмыспен қамту, баспана алу, заң және басқа да мәселелер бойынша шалғай жатқан аудандардың жастарына мобильдік топтар кеңес беруде. Жаңа облыс болғандықтан шешімін күткен жастарға қатысты мәселе аз емес. Сондықтан олардың шешімін табуда облыс жастарына жан-жақты қолдау көрсету — «Жастар рухы» жастар қанатының негізгі міндеті. Бұл ретте Абай жастары жұмыс істеуге дайын екенін жеткізгім келеді. «Ел болам десең, бесігіңді түзе» демекші, жүрегінде Отанға деген махаббаты, еліме түймедей болса да пайдам тисе екен деген ниеті бар жастар тұрғанда еліміздің болашағы жарқын болары анық. Жастарға көп ештеңе қажет емес, оларға тек мүмкіндік керек. Еліміздің болашағы үшін бірлесе жұмыс істейік! — деп түйіндеді сөзін Темірлан Бақтияров.
«Жастар рухы» жастар қанатының Абай облысы филиалының төрағасы лауазымына Темірлан Бақтияров сайланды.
