Alikhan Вokeikhan University филология кафедрасының ұйымдастыруымен «Жұмыс берушілерді білім беру бағдарламарын әзірлеуге тарту: ынтымақтастық стратегиясы және моделі» атты семинар өтті.
Зарина КӘП
«Семей таңы»
Семинар барысында гуманитарлық факультеттің білім беру бағдарламалары талқыланып, студенттердің іс-тәжірибесі мен дуалды оқытуды ұйымдастыру және еңбекпен қамту мәселелері қарастырылды. «Alikhan Вokeikhan University» білім беру мекемесінің оқу-әдістемелік бөлімінің басшысы Анна Маломошнова «Гуманитарлық цикл мамандықтары бойынша білім беру бағдарламаларын қалыптастыру ерекшеліктері» тақырыбында баяндама жасады.
Семинар басталмас бұрын университет психологі қатысушылардың емін-еркін пікір алмасып, өз ойларын айтуы үшін тренинг ұйымдастырды.
40-қа жуық оқытушы мен жұмыс берушілер қатысқан семинардың негізгі бөлімінде филология кафедрасының әрбір білім беру бағдарламасының эдвайзерлері өз мамандықтарының білім беру ерекшеліктерімен таныстырса, жұмыс берушілер ұсыныс-тілектерін ортаға салды.
— Бұл семинарды өткізудегі басты мақсатымыз — жұмыс берушілермен тығыз қарым-қатынас құру. Біздің түлектеріміз белгілі бір мекемеге жас маман ретінде барғанда қандай талаптар қойылатынын біліп, ұсыныс-тілектерімен танысу. Олардың ұсыныстарын талдап, білім беру бағдарламасының мазмұнына өзгерістер енгізетін боламыз. Осы өзгерістер арқылы жұмыс берушінің талаптарына сай маман дайындап шығаруды мақсат етіп отырмыз,- дейді филология кафедрасының профессоры, іс-шараны ұйымдастырушы Гүлнар Әбікенова.
