Өткен жұма, 27 қаңтар күні Абай облысының әкімі Нұрлан Ұранхаев «СемАЗ» ЖШС және «Daewoo Bus Kazakhstan» ЖШС зауыттарына барды.
Жадыра ТӨЛЕГЕНҚЫЗЫ,
«Семей таңы»
Облыс әкімі Нұрлан Ұранхаев екі өндірістің машина құрастыру желілерін аралап көрді.
Негізі 2006 жылы қаланған «СемАЗ» ЖШС — Қазақстанда ауыл шаруашылығы және жүк техникаларын құрастыратын ірі өндіріс орны. Мұнда жүк көліктері мен тракторлардың бірнеше түрі шығарылады. Зауытта «ГАЗ» және «HINO» маркалы жеңіл көліктер, «BELARUS» маркалы трактор, «SHACMAN» және «DONGFENG» жүк көліктері, «ZHONGTONG» және «DONGFENG» қалалық автобустары, «Урал» маркалы жол талғамайтын және арнайы мақсаттағы көліктер жасалады. Кәсіпорында озық заманауи жабдықтар қолданылады. Құрастыру желілерінің қуаты жылына 10 000-нан астам техниканы құрайды.
Кәсіпорын үнемі даму үстінде. 2022 жылы облыс және республика диқандары үшін «JINMA» маркалы трактордың жаңа үлгісі шығарылды.
— Біз «BELARUS» маркалы тракторларды шығарамыз, жуырда «JINMA» деген тағы бір трактор маркасын шығаруды қолға алдық. Бұл трактор ыңғайлылығымен ерекшеленеді, кондиционер бірден негізгі жинақтауға келеді. Трактордың эргономикасы жақсырақ және заманауи. Бізде самосвалдар, ауыл шаруашылығына арналған көліктер де шығарылады. Өйткені бұл сала ел экономикасының драйвері болып табылады. Алғашында құрылыс техникасына көбірек көңіл бөлсек, енді шаруаларымызға жаңа жайлы техника ұсыну үшін ауыл шаруашылығына ден қойдық, – дейді «СемАЗ» ЖШС бас директоры Марат Мәкішев.
«Daewoo Bus Kazakhstan» — Қазақстандағы бірінші толық циклді автомобиль құрастыру зауыты. Өндіріс импорттық автокөлік жинақтарынан тораптар мен агрегаттарды құрастыруды ғана емес, сонымен қатар шанақтарды құрастыру-дәнекерлеуді және бояуды жүзеге асырады.
— «Daewoo Bus Kazakhstan» зауытынан Daewoo BC 211 GDW, 11 метрлік жартылай төмен еденді автобус, төмен еденді Daewoo BC 120 GDW сияқты жаңа автобус үлгілері шығарылса, 2022 жылдың 5 қыркүйегінде Daewoo BH 120 F GDW туристік автобусы шығарыла бастады,- деді «Daewoo Bus Kazakhstan» бас директоры Әсемқан Досқожанов.
Облыс әкімі Нұрлан Ұранхаев Семейдегі бұл машина құрастыру зауыттары аймақ экономикасының дамуына тың серпін беретінін атап өтті.
– Зауыттың ассортименті кең. Техникалар коммуналдық қызмет саласына, автокөлік кәсіпорындарына, жолаушылар тасымалына да арналған. Облысымызда осындай кәсіпорындардың жұмыс істеп тұрғаны қуантады, – деді аймақ басшысы Нұрлан Ұранхаев.
