Семей қаласында әлеуметтік кәсіпкерлік қарқынды дамып келеді. Аталған саладағы игілікті шаралардың нәтижелі түрде жүзеге асуына «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қоры зор ықпал етуде.
Бүгін Alikhan Bokeikhan университетінде «Табысты отбасы» жобасының бірінші кезеңінің 29 түлегіне құрал-жабдықтар түріндегі гранттар табысталды. Оларға ноутбуктер, тігін машиналары, пештер, миксерлер, кушеткалар және мультимарка сканері тарту етілді.
Құрал-жабдықтарды табыстауға арналған іс-шараға Абай облысы әкімінің орынбасары Шалқар Байбеков және «Самұрық-Қазына» АҚ компаниялар тобының өкілдері қатысты.
Жоба шеңберінде кешенді оқыту бес бейіндік бағыт бойынша жүргізіліп, қатысушылар «ЅММ», «Кондитерлік іс», «Сұлулық индустриясы», «Тігін ісі» және «Автоэлектрик» мамандығын игерген-ді.
Жабдықтар жиынтығын тапсыру рәсімінде сөз алған облыс әкімінің орынбасары Шалқар Байбеков тұрғындардың өмір сүру сапасын жақсартуға және өңірлерді дамытуға бағытталған жобаларға әрдайым қолдау болатынын атап өтті.
— «Табысты отбасы» жобасы аз қамтылған, ерекше қажеттіліктері бар балаларды тәрбиелеп отырған отбасыларға, көп балалы аналарға, жалғыз басты ата-аналарға көмек көрсетуге бағытталған. «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қорына осындай жобаны қолдағаны үшін алғыс білдіреміз, — деді Шалқар Заманбекұлы.
— Бұл жобаның мақсаты — сұранысқа ие мамандықтарға оқыту және шағын гранттық қолдау көрсету арқылы адамдардың әл-ауқатын арттыру. Гранттар Ұлытау облысында 14 түлекке, Жетісу облысында 24 қатысушыға берілді. Бүгін Семейде осы әлеуметтік жобаның 29 түлегіне жабдық табыстағалы отырмыз, — деді «Samruk-Kazyna Trust» әлеуметтік жобаларды дамыту қорының бас директорының орынбасары Серғожа Қалиасқаров.
Іс-шарада «Табысты отбасы» жобасының авторы Айжани Нұрланова да сөз алып, жүргізіліп жатқан жұмыстардың нәтижелі боларына сенімін білдірді. Жоба аясында кәсіптің жаңа түрін меңгеруге ерекше ден қойған қатысушыларға алғысын да жеткізді. Айжани Адайқызының айтуынша, қатысушылар бейіндік оқыту, тәлімгерлік қолдау, жеке тұлғалық даму және бизнес-дағдыларды дамыту бойынша тренингтерден өтіп, жаттықтырушы мен тәлімгердің барлық талаптарын орындап шығыпты.
— «Табысы отбасы» жобасының арқасында мен кондитер болдым, бүгінде тапсырыстар алып жатырмын. Бейіндік оқытудан басқа, біз тәлімгердің үлкен қолдауына ие болдық. Бізді бір ай бойы табысқа жетелеген барлық жаттықтырушылар мен ұстаздарға, әрине, «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қорына алғысымды білдіремін»,- дейді жоба қатысушысы Әсел Бағынғалиева.
Еске сала кетсек, «Табысты отбасы» пилоттық жобасы өткен жылдың 1 желтоқсанында Абай, Жетісу, Ұлытау өңірлерінде, сондай-ақ Түркістан және Ақтөбе облыстарында басталған болатын.
Бүгінде Абай облысында жобаның екінші кезеңінде 41 қатысушы бес бейіндік бағыт бойынша оқудан өтуде.
