27 қаңтар күні Alikhan Bokeikhan University ғимаратында Абай облысы әкімі жанындағы әйелдер істері және отбасылық-демографиялық саясат жөніндегі комиссияның алғашқы отырысы өтті. Жиынға облыс әкімінің орынбасары, комиссия төрағасы Шалқар Байбеков, ҚР Президенті жанындағы әйелдер істері және отбасылық-демографиялық саясат жөніндегі ұлттық комиссия мүшесі Риза Молдашева және Абай облысы әкімі жанындағы комиссия мүшелері қатысты.
Дана ТАЛҒАТБЕК,
«Семей таңы»
Гендерлік тепе-теңдік әлі де болса қоғамда шешімін таппай отырған мәселе екені рас. Конституциямызда әйелдер мен ерлердің тең құқықтары және еркіндіктері басты қағидат ретінде көрсетілген. ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның құрылуы еліміздегі гендерлік саясатты жүзеге асырудың маңызды бір қадамы болып саналады.
Мемлекет басшысының жарлығымен қабылданған 2030 жылға дейінгі отбасылық және гендерлік саясат жөніндегі тұжырымдаманы іске асыру мақсатында Абай облысы әкімі жанындағы әйелдер істері және отбасылық-демографиялық саясат жөніндегі комиссия құрылды. Оның құрамына жергілікті атқарушы органдардың, үкіметтік емес ұйымдардың өкілдері және өңірдің қоғамдық-саяси өміріне белсенді қатысатын әйелдер кірді. Комиссия гендерлік теңдіктің сақталмауына қатысты азаматтардың өтініштерін және отбасылық мәселелерді қарастырады және өзге де негізгі міндеттердің іске асырылуына атсалысады.
Облыс әкімінің орынбасары Шалқар Заманбекұлының төрағалығымен өткен комиссия отырысында облыс әкімі жанындағы әйелдер істері және отбасылық-демографиялық саясат жөніндегі комиссия мүшелері 2023 жылға арналған жұмыс жоспарын талқылады. Облыстық Қоғамдық даму басқармасының басшысы Айдар Садырбаев отбасылық-гендерлік саясат саласындағы ағымдағы жағдай туралы баяндама жасады.
— Статистикалық мәліметтерге сүйенсек, облысымызда 611 мың 888 адам тұрады. Оның 305 мың 71-і, яғни халық үлесінің 49,8 пайызы — әйел адамдар. Мемлекеттік басқару саласында 3511 адам қызмет жасайды, оның 1627–сі, немесе 54 пайызы — нәзік жандылар. Қазіргі таңда басшылық қызметтегі әйелдердің үлесі 10 пайызды құрайды. Басым көпшілігі білім, денсаулық сақтау, әлеуметтік қорғау саласында қызмет етеді. Өткен жылы 7882 әйел мемлекеттік қолдау шараларымен қамтылған және қазіргі уақытта кәсіпкерлікпен айналысады, — деді Айдар Серікқазыұлы.
ҚР Президенті жанындағы әйелдер істері және отбасылық-демографиялық саясат жөніндегі ұлттық комиссия мүшесі Риза Асанқызы облыс орталығында қамқорлыққа зәру талай ана мен балаға пана болып, қайырымдылық ұясы атанған Аналар үйінің ғана жұмыс істеуі жеткіліксіз екенін айта отырып, тұрмыстық зорлық-зомбылықтан зардап шеккен әйелдерге қажетті психологиялық, әлеуметтік және құқықтық көмек көрсету үшін дағдарыс орталығын ашуды ұсынды. Бұл ретте бүгінде өңірде шарасыз күйге түскен қыз-келіншектер мен олардың балаларына көмек көрсетіп, бас сауғалар уақытша мекен ұсынатын 25 орынға шақталған арнайы орталықтың ашылуы жоспарланған. Отырыс барысында бұл мәселе пысықталып, жақын арада шешімін табатыны айтылды.
Комиссия мүшелері ана мен бала өлімінің деңгейі, отбасы институтын нығайту, ерлер мен әйелдердің мүмкіндіктерінің теңдігі, әйелдердің көшбасшылығын дамыту және басқа да көптеген өзекті мәселелерді талқыға салды.
Отбасының әл-ауқатын жақсарту, тұрмыстық зорлық-зомбылықтың алдын алу бойынша қоғамдық ұйымдармен өзара тиімді іс-қимыл жасау, өмірлік қиын жағдайға тап болған азаматтарға уақтылы көмек көрсету мәселелері комиссия жұмысының басым бағыттары болып қала береді.
