Айтыскер ақын Ринат Зайытов өзін-өзі Қазақстан Республикасы Парламент депутатына кандидаттыққа ұсынып, құжат тапсырғанын айтты
Бұл туралы ол өзінің Instagram-дағы парақшасында мәлім етті.
“Құжат тапсырылды. Қазақстан Республикасының Парламенті мәжілісінің депутатын сайлау бойынша №3 бірмандаттық аумақтық сайлау округінің округтік сайлау комиссиясына бүгін мажоритарлық жүйемен өзімді-өзім Қазақстан Республикасы Парламент депутатына кандидаттыққа ұсындым.Мойындаймын. Оңай келген шешім емес”, – деп жазды айтыскер.
Ақын Алматы қаласынан бақ сынайтын боп шешкен.
“Ең әуелгі сұрақ қай аймақтан бақ сынайтыным болған. Алдымда екі таңдау болды: Алматы қаласы және Абай облысы. Әрине бір қараған адамға туған жерім үш жұртымның ең көп өкілдері тұратын аймақ. Абай облысы тиімді болатын еді. Бірақ, «Ауыл итінің аузы сасық» екенін, бір облысты толық аралауға, әр ауылдан сенімді өкіл, әр участоктен бақылаушы т.б. ескерсек оның барлық шығынын өтейтін менде мүмкіндік те, демеуші де жоқ. Оған қоса аймақтарда жергілікті биліктің ықпалы өте үлкен. Сондықтан Алматы. Алматы — азаттықтың астанасы. Алматы-рухты қауымның мекені. Ол аз десеңіз, осыдан төрт жыл бұрын биліктің кісенінен жұлып алған да осы Алматыдағы ағайын. Демеушім жоқ демеймін. Тілектестерім бар. Қазақ бар! Жаратушыдан кейін сенерім солар. Тәуекел. Оңай шегінбейтінімді ескертудің қажеті жоқ шығар. Сонда да…”, – делінген жазбада.
Айтыскердің жанкүйерлері өздерінің тілекші екендерін жеткізіп, барынша қолдау білдірді.
“Құдай өзі қолдасын!”, “Ел үшін шайқаста, тіреу болар Халқың бар!”, “Алла жолыңды оңғарсын”, “Сәттілік тілеймін!”, “Жарайсың! Нар тәуекел деген жақсы”, “Әрдайым қолдайтын халқың барын ұмытпа!”, – деп жазды желі қолданушылары.
Посмотреть эту публикацию в Instagram
