ЗАҢСЫЗ ЖАРНАМАМЕН КҮРЕС БАСТАЛДЫ
Семей қаласының әкімдігі заңға қайшы жарнамаларды анықтау бойынша мониторинг жұмыстарын жүргізді. Аталмыш шара барысында қала көлемінде ешқандай талапқа сай келмейтін жарнамалық-ақпараттық көрнекіліктер ілінген нысандар анықталды.
Аталмыш шара аясында қалалық Мәдениет және тілдерді дамыту бөлімінің мамандары, «Атамекен» кәсіпкерлер палатасының өкілдері, Alikhan Bokeikhan University оқытушылары және еріктілер «Қазақстан Республикасындағы тіл туралы» және «Жарнама туралы» Заңнаманың талаптарына сәйкес көрнекі ақпарат пен жарнаманы рәсімдеу бойынша түсіндіру жұмыстарын жүргізді.
Мамандар қаладағы Абай, Б.Момышұлы, Қ.Мұхамедханов, М.Әуезов көшелеріндегі көрнекі ақпарат пен жарнаманың жай-күйін бақылау мақсатында бірлескен рейд өткізді. Оның барысында жалпы саны 47 нысан қамтылды. Заң бұзушылық орын алған нысандардың иелеріне түсіндіру жұмыстары жүргізілді.
Жарнама дегенде бірінші кезекте сауда орындарының маңдайшаларындағы жарымжан аудармалар еске түседі. Қалалық әкімдік өкілдері анықтағандай, шаһарда мұндай келеңсіздік аз емес екен.
«Қазақстан Республикасындағы тілдер туралы» Заңға сәйкес, көрнекі ақпараттың барлық мәтіндері белгілі тәртіппен орналастырылады. Сол жақ жоғарыда — мемлекеттік тілде, оң жағында төменнен орыс тілінде әрі көлемі жағынан бірдей әріптермен жазылуы керек. Алайда бұл талапты белден басатындар көп.
Бұдан басқа да заңбұзушылықтар жеткілікті. Мәселен, кәсіпкерлік бөлімі мамандарының айтуынша, ғимараттардың иелері өз нысандарындағы ақпараттық тақтайшаларды таза және кемшіліксіз ұстауы міндетті. Сондай-ақ дүкендер мен кеңселердің көшеге қарайтын қасбеттеріне жеңіл безендіру жұмыстары жүргізілуі тиіс. Бұл орайда ғимараттардың әрленуі мен құрылымдық элементтерін әркімге өз бетінше түрлендіруге қатаң тыйым салынады.
— Семей қаласы облыс орталығы болғандықтан, жарнамалық сипаттағы мәтіндер мен материалдар барлық талаптарға сай болуы керек. Біз осы бағыттағы жұмысты әлі де жалғастырамыз. Бұл мәселе қала әкімінің бақылауында тұр, — дейді кәсіпкерлік бөлімінің басшысы Арайбек Хамзаев.
Бұл бағыттағы жұмыстар ендігі аралықта да тұрақты түрде жүргізілетін болады. Алайда жарнамаға бей-жай қарайтындар алдағы уақытта жай ескертумен құтылмауы мүмкін. Олқылықтар қайталанған жағдайда Қазақстан Республикасының заңнамасына сәйкес, шара қолданылуы бек мүмкін.
