Ұлттық тәрбие
Дәстүр – әр халықтың ғасырлар бойы қалыптасып, тарихи сүзгіден өткен құндылықтар қағидасы. Бүгінгі жаһандану заманында ұлттық бірегейлікті ғана емес, бірлікті, татулықты сақтаудың бірден-бір жолы — ұлттық дәстүрді ұлықтап, жас ұрпақтың бойына сіңіру. Осыдан бір жарым жыл бұрын осындай жауапкершілікті мойнына алып, бүгінде игі істерге бастамашы боп жүрген «Дәстүрге жол. Қазақ аналары» республикалық қоғамдық бірлестігі ашылған болатын.
Зарина КӘП
«Семей таңы»
Өткен сенбі күні осы қоғамдық бірлестіктің облыстық филиалы Семей қаласында ашылды. Бірлестік филиалының ашылу салтанатына облысымызда тұратын қыз-келіншектер, әжелер, сонымен қатар бірлестік жетекшісі Айнұр Жүгінісова қатысты.
— Біздің қоғамдық бірлестік бір жарым жыл бұрын құрылды, бүгінде айтарлықтай жетістіктерге жетудеміз. Қазір еліміздің барлық аймақтарында 75-тен астам филиалдарымыз бар. Міне, енді Алаштың астанасы Семей қаласында ашып отырмыз. Қолымыздан келгенше ұлттық құндылықтарымызды, салт-дәстүрлерімізді жастарға насихаттаудамыз. Еуропаға еліктеп кеткен тәрбиемізді өзіміздің ата жолымызға қайтару мақсатында жұмыс жүргізудеміз. Мақсатымыз — жас ұрпақтың бойына ізгілік, адамгершілік қасиеттерді сіңіру, ұлттық киімдерді насихаттау. Қазір дизайнерлер де қазақы оюмен әр түрлі киімдер тігуде. Тақиямыз, шапанымыз қайта оралды. Осының бәрі аз ғана болса да біз үшін жетістік,- дейді «Дәстүрге жол. Қазақ аналары» республикалық қоғамдық бірлестігінің негізін қалаушы, төрайымы Айнұр Жүгінісова.
Іс-шара барысында қалалық «Асыл әжелер» хоры өнер көрсетіп, халық әндерінен шашу шашты. Бауыржан Момышұлы атындағы №34 орта мектептің оқушылары Абай өлеңдерін мәнерлеп оқыды.
Қоғамдық бірлестіктің Абай облысы бойынша филиалының төрайымы болып Райхана Ахметова сайланды.
— Бүгінгі жиынға келген әрбір анаға, қыз-келіншектерге айтар алғысым шексіз. «Бір үйдің баласындай, бір қолдың саласындай» бірлесіп, келешек ұрпақ тәрбиесіне өзіміздің үлесімізді қосайық. Зере мен Ұлжан тәрбиелеген Абайдай тұлғалардың қалыптасуына аналардың қосар үлесі зор. Ұрпақ алдындағы, ұлт алдындағы жауапкершілікті сезініп, бала тәрбиесіне бейжай қарамайық. Ісіміз сәтті болсын,- деді филиал төрайымы.
Қаламыздағы ардагер ұстаздардың бірі, шөбере сүйіп отырған салиқалы әже Ғайни Серғазықызы бұл бірлестіктің болашағынан көп үміт күтетінін жеткізді.
— Қасиетті ұлылар еліне Айнұр Жүгінісова бастаған ұжым келіп отыр. Қазіргі күні ұлттық құндылықтарымызды жоғалтып алмау аса маңызды. Бұл қоғамдық бірлестіктің құрылуын руханиятымызды, салт-дәстүрімізді сақтау, келер ұрпаққа қалдыру үшін жасалған игі іс деп білемін. Сондықтан да Абай ұрпағын жалғастырушы семейлік аналарымыз, келіндеріміз бен қыздарымыз бірлестік жұмысын абыроймен атқарады деген сенімдемін,- деді.
Шара соңында қонақтарға «Абай мұрасын қолдану жолдары» атты кітап сыйға берілді. Ақ жаулықты әжелеріміз бірлестіктің жұмысына қатысты ұсыныс-пікірлерін ортаға салып, жоспарларын талқылады.
