Спорт
АЛҒАШҚЫ ОБЛЫСТЫҚ ЧЕМПИОНАТ ӨТУДЕ
Ақпан айының 5 күні «Арена» спорт кешенінде қазақ күресінен жасөспірімдер мен кіші жасөспірімдер арасында Қазақстан Республикасы чемпионатының салтанатты ашылуы өтті. ҚР Мәдениет және спорт министрлігі, спорт және дене шынықтыру істері комитеті, Qazaq kuresi ассоциациясы, Абай облысының дене шынықтыру және спорт басқармасы тарапынан ұйымдастырылған жарыста 2006-2007 және 2008-2009 жылдары туған жас спортшылар сынға түседі.
Дана ТАЛҒАТБЕК,
«Семей таңы»
Абай облысы тарихында алғаш рет өткізіліп отырған республикалық чемпионатқа қатысуға 530 кіші жасөспірім, 730 жасөспірім ұлдар мен қыздар келді.
Балуандар додасының ашылу салтанатына облыс әкімі аппаратының басшысы Жасұлан Сәрсебаев, Qazaq kuresi ассоциациясының бас директоры Ербол Мырзабосынов, облыстық спорт басқармасының басшысы Ержан Әбілқасымов, ұлттық құраманың бас бапкері Ерлан Естек, «Қазақстан барысы» және «Дала қыраны» титулдарының иегері Мұхит Тұрсынов қатысты. Жарыс қонақтары жастарды спортқа баулу арқылы ғана денсаулығы мықты ұрпақты тәрбиелеп өсіре алатынымызды, ал кілемде белдесіп жатқан жасөспірімдер ертеңгі әлем және Азия чемпиондары болуы мүмкін екенін атап өтті. Шақырылған қонақтар Абай елінде жалауын көтерген чемпионатқа қатысушы жас спортшыларға сәттілік тіледі.
Салтанатты шараның шымылдығын түрген облыс әкімі аппаратының басшысы Жасұлан Сәрсебаев чемпионат спортшылардың мүмкіндігін ашатынын атап өтіп, ірі додаларда балуандардан жақсы нәтиже күтетінін айтты.
- Бүгін Абай елі үшін тарихи сәт, қазақ күресінен республика чемпионатын өткізу –үлкен мәртебе. Халқымыздың ең көне спорт түрі саналатын қазақ күресі бүгінгі күні елімізде белсенді дамуда. Жыл сайын республикалық деңгейдегі чемпионаттардың өткізіліп келе жатқаны — соның айғағы, — деді Жасұлан Бірлікұлы.
Бүгінде қазақ күресі — барша қазақстандықтарға ортақ құндылық әрі ұлттық бренд болып табылады. Оған қоса ұлттық жаңа болмысты қалыптастыратын, рухты әрі намысты жастарымызды батырлық пен қайсарлыққа, өжеттілікке баулитын тәрбие құралы. Қазақстан біріншілігі Абай облысында тұңғыш рет өткізіліп отыр. Бұл күш сынасуда барлық қатысушыларға сәттілік тілеймін! Жарыстың жоғары деңгейде өтіп жатыр, облыс әкімдігіне алғысымды білдіремін, — деді Qazaq kuresi ассоциациясының бас директоры Ербол Мырзабосынов.
Бұл күні жас балуандарға қолдау білдіруге келген жанкүйерлер спорт кешенін лық толтырды.
Кіші жасөспірімдер және жасөспірімдер арасындағы ҚР чемпионатының бірінші жарыс күнінің қорытындысы шығарылып, жеңімпаздар мен жүлдегерлер анықталды. 60 келі салмақта белдескен жамбылдық Ақниет Сәбітбек, 65 келі салмақ дәрежесінде Батыс Қазақстаннан келген Санжар Бақытжан, 70 келі салмақта түркістандық Әділет Адырбеков, 75 келі салмақта сынға түскен қарағандылық Әділбек Аман қарсыластырынан басым түсіп, жеңіске жетті.
Айта кетейік, 5-9 ақпан күндері аралығында өтетін чемпионатқа еліміздің барлық облыстарынан 1200-ден астам балуан қатысады.
