Жолаушылар тасымалы
ЖҮРГІЗУШІЛЕРДІҢ ТАЛАБЫ – ЖАЛАҚЫНЫ КӨБЕЙТУ
Семейде жолаушылар көлігі жетіспейді. Қалалық әкімдік мұның себебін жүргізушілердің тапшылығымен байланыстырады.
Айтолқын САМАТОВА,
«Семей таңы»
Кеше, 6 ақпан күні таңертең «Семей паркі» ЖШС мен «Автотрансемей»ЖШС жүргізушілері желіге шығудан бас тартты. Автопарк қызметкерлері жалақыларын 40 пайызға көтеруді талап етті.
Семей қалалық әкімдігінің баспасөз қызметінің мәліметінше, биылғы жылдың қаңтар айында автобус парктерінің басшылығы жүргізушілерді ынталандыру және жаңа кадрларды тарту мақсатында еңбекақыны 40 пайызға дейін көтерген.
— Осы жағдайды және қазіргі жүргізушілердің жоғары жүктемесін ескере отырып, дүйсенбі, 6 ақпан күні «Семавтопарк» ЖШС және «Автотрансемей» ЖШС автобус паркі жүргізушілерінің арасынан бір топ адам жұмысқа шықпай, автобустардың таңертеңгі жолға шығу кестесін бұзды. Осылайша, барлық автобус парктерінің кестесі бұзылды. Олардың басты талабы жалақыны көтеру болды, — деп мәлімдеді Семей қалалық әкімдігінің баспасөз қызметі.
Автобус парктерінің басшылығы қызметкерлермен бұл мәселені бірнеше рет талқылап, жалақыға үстемақыны 2023 жылдың ақпан айынан бастап есептеу туралы келісімге келген екен.
— Келісімдерге қарамастан, бір топ адам автобазадан шығаберісте көлік қозғалысын әдейі жауып тастады. Автобус парктері басшылығының мәліметінше, 6 ақпандағы жағдай бойынша, жалақыдан қарыз жоқ, еңбекақыны көтеру есеп-қисабы дайындалған. Семей қаласының әкімдігі шұғыл шара қолданып, заң бұзушылыққа жол берген қызметкерлермен әңгімелесті. Автобус паркі басшылығына алдағы уақытта мұндай келеңсіздіктерге жол бермеу үшін аталған топты қолданыстағы заңнамаға сәйкес белгіленген жауапкершілікке тарту туралы ұсыныстар айтты,- деп хабарлады Семей қаласы әкімдігінің баспасөз қызметі.
Семей қаласының жолаушылар көлігі және автомобиль жолдары бөлімінің мәліметінше, бүгінгі күні 182 қоғамдық көлік желіде қызмет көрсетуде.
