Еуропадағы қауіпсіздік және ынтымақтастық ұйымының (ЕҚЫҰ) Демократиялық институттар және адам құқықтары жөніндегі бюросы (ДИАҚБ) Қазақстандағы сайлау мен сайлауалды үгіт-насихатқа сапалы бақылау жүргізуге ниетті, деп хабарлайды ҚазАқпарат.
Астанада өткен брифингте ЕҚЫҰ/ДИАҚБ Қазақстандағы парламенттік сайлауды қадағалау жөніндегі миссиясының басшысы Оуэн Мерфи сайлау нәтижелері емес, процестің өзі қызықтыратынын айтты.
«Біздің миссия сайлау алдындағы үгітке сапалы бақылау жүргізеді. Бізді сайлау нәтижелері емес, процестің өзі қызықтырып отыр. Сайлауды бақылау миссиясының рөлі қадағалау, араласу немесе көмек көрсету емес. Біздің жұмысымыз сайлауды бақылау ғана. Бақылау және бағалау миссияның алдағы есептерінде жарияланады. Сайлау күніне екі апта қалғанда біз сайлау процесінің нақты сипаттамасы болатын және сайлау бөлігіндегі мәселелерді көрсететін аралық есепті жариялаймыз», — деп түсіндірді Оуэн Мерфи.
О. Мерфи сайлау процесі аяқталғаннан кейін бірнеше айдан кейін түпкілікті есеп жарияланатынын айтты.
Оның сөзінше, құжатта сайлауды өткізу тұрғысынан билік пен басқа да мүдделі органдар қарауы керек ұсыныстар болуы мүмкін.
Айта кетейік, Мәжіліс пен мәслихат сайлауына ЕҚЫҰ-ның Демократиялық институттар және адам құқықтары жөніндегі бюросынан 332 байқаушы келеді.
