Қыстың соңғы айы келді. Өзіңізге және жақындарыңызға белсенді қысқы демалысты ұйымдастыру туралы ойланып жүрген боларсыз. Осыған орай, біз қала тұрғындарының назарына көңілді демалыс орындарының тізімін ұсынамыз.
Қалада биыл 3 мұз айдыны жұмыс істейді – «Цементник» стадионы, «Локомотив» стадионы, «Ертіс» стадионы. Осы орындардың барлығында келушілер коньки мен шананы жалға алуларына болады, арнайы жабдықталған жылы киім ауыстыратын бөлмелер бар, демалушылар ауқатану үшін асханаға да бара алады. Мұнда мектеп оқушыларына, студенттерге және ұжымдарға арналған түрлі акциялар өткізіледі.
Осы қыста семейліктердің сүйікті орнына орталық алаң айналды. Онда күнделікті қала тұрғындары еркін сырғанақпен сырғанап, мұз айдынында спорт түрлерімен айналыса алады. Сонымен қатар, жабдықтарды жалға беретін және келушілерге арналған арнайы киім ауыстыратын бөлмелер жабдықталған.
Балаларды қысқы спорт түрлеріне белсенді түрде тартуға ерекше көңіл бөлінген. Жалпы білім беретін мектептер мен интернаттар жанындағы балалардың қысқы сабақтары үшін 31 хоккей корты мен 37 мұз айдыны құйылды. Оның ішінде «Локомотив» стадионында, 35 кварталда, Юность шағын ауданында, Семей орманы аумағында, Қарағайлы демалыс ауданында, Озерки, Новобоженовка, Көкентау ауылдық округтерінде, Шүлбі, Шақаман кенттерінде хоккей мен мұз айдындары тұрғындарға қызмет етіп тұр.
Айта кету керек, Семейде қысқы спорт түрлерін дамытуға арналған спорт мектебі бар. «Қысқы спорт түрлері бойынша олимпиадалық резервтің балалар-жасөспірімдер мектебі» КММ шаңғы жарысы, биатлон және конькимен жүгіру спорты түрлерінен спортшыларды тәрбиелейді. Мектепте тәжірибелі жаттықтырушылардың жетекшілігімен 250-ге жуық спортшы жаттығады.
«Қалада қысқы спорт түрлерін дамыту үшін жағдай жасалуда және біз қала тұрғындарына қолайлы демалыс орындарын ұйымдастыру мақсатында алдағы уақытта үлкен жоспарларды жүзеге асыратын боламыз. Алдағы уақытта біз спортты халық арасында танымал ету үшін ірі жарыстар өткізуді жоспарлап отырмыз. Біз әсіресе қаламыздың кішкентай тұрғындарын белсенді және салауатты өмір салтына тартқымыз келеді», — деп атап өтті Семей қаласы әкімдігінің дене шынықтыру және спорт бөлімінің басшысы Бауыржан Дүйсенбаев.
