Абай облысының волонтерлері Түркия елінде ең ауыр жер сілкінісі салдарынан зардап шеккендерге гуманитарлық көмек жинай бастады, Абай облысының дәрігерлері көмек көрсетуге дайын.
Бүгінгі күні облыстың денсаулық сақтау басқармасының басшылығы дәрігерлердің тізімін бекітіп, үкіметке келісуге жіберді. Дәрігерлер құрамына табиғи апаттар аймағында сұранысқа ие мамандар кірді. Олардың қатарында анестезиолог, реаниматолог, хирург және терапевт дәрігерлер бар.
Естеріңізге сала кетейік, Түркияның оңтүстік аймақтарында және Сирияның солтүстігінде дүйсенбі мен сейсенбіде болған бірнеше мың адамның өмірін қиған үш ірі жер сілкінісінен кейін құтқару операциясы жалғасуда. Соңғы мәліметтер бойынша, Түркияда жер сілкінісі кезінде қаза тапқандар саны 14 014-ке, жараланғандар саны 63 794-ке жетті.
Жер сілкінісі салдарынан 6 мыңға жуық ғимарат, оның ішінде көппәтерлі тұрғын үйлер құлады.
Сондай-ақ Ұлттық волонтерлер желісі ҚР Ақпарат және қоғамдық даму министрлігінің үйлестіруімен Түркия мемлекетінде жер сілкінісінен зардап шеккендерге гуманитарлық көмек жинау іс-шарасы басталғанын хабарлайды.
Облысымызда гуманитарлық көмек Семей қаласы, Абай көшесі, 99 мекенжайында орналасқан «Birgemiz» өңірлік волонтерлер фронт-офисінде және Абай облысының Жастар ресурстық орталығында (Абай көшесі, 102, байланыс телефоны: +7 708 367 7645) жиналады.
Жиналған гуманитарлық көмек Ұлттық волонтерлік желісі арқылы Қазақстан Республикасындағы Түркия елшілігіне тапсырылады. Қажетті заттар — көрпелер, ұйықтауға арналған қаптар, термос, қол шамы, пауэрбанк, памперстер, жеке гигиена құралдары (гигиеналық төсемдер), қысқы киім (ересектер мен балаларға, заттар жаңа болуы керек), пальто-курткалар, жаңбырға арналған жамылғы, етік, жемпір, шалбар, қолғап, шарф, қалпақ, шұлық, іш киім және басқа материалдар.
Сондай ақ қаржылай көмек мына реквизиттер арқылы қабылданады:
Заңды тұлғалар үшін:
«Қазақстан Халық Банкі» АҚ
«Ұлттық волонтерлер желісі» ЗТБ
БСН 120940015916
БИК: HSBKKZKX
Р/С: KZ23601A871001005521
Жеке тұлғалар үшін:
Kaspi.kz қосымшасында — Төлемдер — Қайырымдылық бөлімінде: «Ұлттық волонтерлер желісі» ЗТБ Түркиядағы жер сілкінісінен зардап шеккендерге гуманитарлық көмек.
«СТ» — ақпарат
