Семейде «From Semey» атты жергілікті тауар өндірушілердің көрмесі өтті. Қаладағы Политехникалық колледжде ұйымдастырылған іс-шараға жергілікті тауар өндірушілердің 30-дан астам кәсіпорындары қатысып, тоқыма, полиграфия, қағаз, жиһаз, пластмасса, металл, құрылыс және басқа да өнімдерін ұсынды.
Көрмені тамашалауға қала әкімі Нұрбол Нұрсағатов, жеке кәсіпкерлер, архитекторлар мен қала тұрғындары келді.
Көрме жергілікті тауар өндірушілердің кәсібіне қолдау көрсету, кәсіпкерлердің өзара тәжірибе алмасуына ықпал ету мақсатын көздейді.
— Бұл көрмені өткізудегі негізгі мақсатымыз — жеке кәсіпкерлердің өнімін жарнамалау, тұтынушыларға таныстыру. Мұнда өндірушілер тоқыма, полиграфия, қағаз, жиһаз, пластикалық материалдар, металл, құрылыс материалдары сынды басқа да өнімдерін таныстырып, ерекшеліктері туралы баяндайтын болады. Әзірге тек қалалық деңгейде ұйымдастырылуда, алдағы уақытта облыстық, республикалық деңгейде өткізу жоспарда бар,- дейді қалалық кәсіпкерлік бөлімінің басшысы Адайбеков Хамзаев.
Мұнда полимерден жасалған кәріз люктері, кірпіш үлгілері, профильдер мен брусчатка, сонымен қатар қаланың жеңіл өнеркәсіп саласынан киім-кешек бұйымдары да бар.
— Өндіріс саласында 60 мыңнан астам адам жұмыс істейді. Қазіргі таңда елімізде кәсіпкерлікті дамытуға басымдық беріліп отыр, өйткені бизнес — экономиканың драйвері. Кәсіпорындарымыз көптеген өнімдер шығарады, біз өз өнімдерімізді қаламызды жаңғырту жұмыстарына пайдалана аламыз. Өз өңірімізде осындай кәсіпкерлердің барына қуаныштымыз. Болашақта бірлесіп жұмыс істейміз деп ойлаймын. Бұл бір реттік акция емес, алдағы уақытта да өтетін болады,– деді қала әкімі Нұрбол Төлегенұлы.
Көрмеде, сыртқы жарнамадан бастап 3D принтерде басып шығару бөлшектеріне дейін, 30-ға жуық тауар өндірушілер өз өнімдерін көрсетті.
Абай облысының орталығында құрылыс жұмыстары қарқынды жүргізілетін болады, осыған орай қала әкімі көрмеге ұсынылған құрылыс материалдарына ерекше назар аударды.
– Құрылыс материалдарын өзімізде өндіру біз үшін өте маңызды. Жоғары сапалы, тиімді болғаны дұрыс. Алайда біздің өндірушілерге креатив пен жаңашылдық жетпейтін сияқты. Мысалы, басқа облыстарда тротуар плиталарын өндіруде бізге ұқсамайтын мүлдем басқа матрицаларды пайдаланатынын байқадық. Мен тауар өндірушілерге ескі дизайннан бас тартып, жаңа идеялар қосуды ұсындым. Олар мұнымен келісті, жаңа матрицаларға тапсырыс беріп, жаңа элементтер жасайтындарын айтты,- деді қала әкімі.
Сандуғаш ӘСКЕРБЕКҚЫЗЫ,
Шәкәрім университеті студенті
